Almaty Memlekettik qýyrshaq teatry mereıli 88-shi maýsym shymyldyǵyn 29 maýsym kúni saǵat 12:00-de franýz jazýshysy Sharl Perronyń álemge áıgili balalarǵa arnalǵan «Etik kıgen Mysyq» ertegisimen jáne jasóspirimder men eresekterge baǵyttalǵan belgili klassık qalamger Nıkolaı Gogoldiń «Shekpen» spektaklimen jabýdy josparlaýda.
Tamyrly tarıhy ǵasyrǵa jýyq Almaty Memlekettik qýyrshaq teatry úshin 88-shi maýsym taǵylymdy qoıylymdarǵa, jarqyn jeńisterge, zor jetistikterge, jaǵymdy jańalyqtarǵa toly eleýli sátterimen este qaldy.
10 jyldan keıingi qýyrshaq teatrynyń jańarýy – 88-shi maýsymnyń eleýli oqıǵalary qatarynda. Qýyrshaq teatrynyń ǵımaraty, foıesi, sahna keńistigi, kórermen jáne daıyndyq zaldary, grım bólmeleri, garderob, sanıtarlyq-gıgıenalyq jáne basqa da oryndar tolyqtaı kúrdeli jóndeýden ótip, teatr qyzmetkerleri jańa shabytpen jumysyn jalǵastyrsa, kórermender jańa kelbet pen zamanaýı qoıylymdarǵa kýá boldy.
Álemdik arenadaǵy qýyrshaq teatrynyń jańasha kelbetin qalyptastyrý, halyqaralyq shyǵarmashylyq baılanystardy nyǵaıtý barysynda teatr ujymy 88-shi maýsymda Bolgarııa, Túrkııa, Reseı memleketterinde ótken halyqaralyq teatr festıvalderinde úzdik atanyp, jetistikter qorjynyn ataýly júldelermen tolyqtyrdy.
Almaty qalasy ákimdiginiń qoldaýymen qýyrshaq teatrynyń 12 qyzmetkeri Germanııa, Túrkııa jáne Reseı elderinde kásibı biliktilikterin jetildirý múmkindigine ıe bolyp, shyǵarmashylyq sheberlikterin sheteldik bilim berý oryndarynda shyńdady.
88-shi maýsymda qýyrshaq teatrynyń tarıhyna eleýli jańalyq alyp kelgen I-shi Halyqaralyq «ALMATY PUPPET FESTIVAL» qýyrshaq teatrlar festıvali tuńǵysh ret ótkizilip, Polsha, Grýzııa, Bolgarııa, Túrkııa, Ózbekstan jáne Qazaqstannyń 150-ge jýyq úzdik teatr maıtalmandarynyń basyn qosty.
Qýyrshaq teatrynyń repertýar qorjyny 88-shi maýsymda 5 jańa qoıylymmen tolyqty. Geometrııalyq pishinder álemimen tanystyratyn «Baýyrsaq» ertegisi, alpaýyt álemde anasyn joǵaltqan kishkentaı mamonttyń tańǵajaıyp oqıǵasyn baıandaıtyn «Anasyn izdegen Mamont» spektakli, boks sheberi ári ult maqtanyshy Bekzat Sattarhanovtyń batyl rýhyn dáripteıtin «Chempıon» qoıyly, barsha búldirshinderdiń súıikti keıipkeri týraly syr shertetin «Etik kıgen Mysyq» ertegisi jáne grýzııalyq rejısser Nıkoloz Sabashvılıdiń jetekshiligimen sahnalanǵan «Shekpen» qoıylymy kórermenniń ystyq yqylasyna bólendi.
Elimizdiń ózge de óńirleri turǵyndaryna Almaty Memlekettik qýyrshaq teatrynyń ónerin tanystyrý jáne dáripteý maqsatynda teatrdyń shyǵarmashylyq ujymy Qaraǵandy jáne Taldyqorǵan qalalarynda gastroldik is-saparlar ótkizdi.
Aldaǵy 89-shy teatr maýsymynda kórermenderdi utymdy jobalar, jaǵymdy jańalyqtar, zamanýı spektaklder asyǵa kútetin bolady.
