بەلگىلى تەلەجۇرگىزۋشى، جۋرناليست دينا تولەپبەرگەن ايەل تاعدىرىنا قاتىستى ماسەلەلەرگە ءوز پىكىرىن ءبىلدىردى، دەپ حابارلايدى "ادىرنا" ۇلتتىق پورتالى.
"استارلى اقيقات" باعدارلاماسىنىڭ جۇرگىزۋشىسى، جۋرناليست دينا تولەپبەرگەن الەۋمەتتىك جەلىدەگى پاراقشاسىندا ءتۇرلى پىكىر تۋدىرعان. ول Instagram جەلىسىندەگى پاراقشادا قىز بالا يەن ايەلدىڭ تاعدىرىنا قاتىستى قاناتتى سوزدەرى مەن ءتۇرلى تاقىرىپتا بەينەلەر جاريالاپ ءجۇر. سونىڭ بىرىندە تەلەجۇرگىزۋشىنىڭ "قىز بالانى جات-جۇرتتىق دەپ ءبولۋ - فاشيزم" دەگەن پىكىرى جەلى قولدانۋشىلارىن دۇرلىكتىردى.
«ايەلدى ۇرۋ – قىلمىس. بۇل بوس ۇران ەمەس، بۇل ەندى زاڭ. ءبىز «قىز – جات-جۇرتتىق دەگەن ويدان جيرەنۋىمىز كەرەك. ءوز باۋىرىڭنان شىعىپ، توعىز اي كوتەرگەن پەرزەنتىڭدى قىز بولعانى ءۇشىن «جات» دەپ جاقىنداتپاۋ – فاشيزم. مەن ءاربىر اتا-انانىڭ ءوز قىزىن جات ەمەس، جانىم دەگەنىن قالايمىن. «ۇلدىڭ مۇراسى وزىمىزدە قالادى، قىزدىڭ مۇراسى قۇدالارعا بارادى» دەپ ويلاۋ قاتە! ۇل ءوز پاتەرىنە ءوزى اقشا تاپسا، ۇتىلمايدى. ال قىز ءۇشىن بۇل – قاۋىپسىزدىك العىشارتى»، - دەپ ول الەۋمەتتىك جەلىدەگى پاراقشاسىندا جازدى.
جەلىدەگى وقىرمان دينا تولەپبەرگەندى قولداسا، ەندىگى ءبىرى قارسى پىكىر جازىپ قالدىرعان.
ايتا كەتەيىك، دينا تولەپبەرگەن قىزداردى كەش تۇرمىسقا شىعۋىن قولدايتىنىن ايتىپ، ءوز پاراقشاسىندا جازبا جاريالاعان ەدى.
