الماتىداعى نارحوز ۋنيۆەرسيتەتى شەشىم شىعارىپ، قازاق تىلىنەن باس تارتتى. بۇل تۋرالى جۋرناليست دياس نۇراقىن Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
ونىڭ مالىمەتىنشە، بۇل جوعارى وقۋ ورنىندا ەڭ ماڭىزدى ءتورت فاكۋلتەتتىڭ ورىس جانە قازاق توپتارى جابىلعان.
ەندى Narxoz-دا ەكونوميكا، قارجى، ەسەپ، قارجىلىق تاۋەكەلدەردى باسقارۋ جانە اقپاراتتىق تەحنولوگيالار سالالارىندا ءبىلىم العىسى كەلەتىندەردىڭ بارلىعى اعىلشىن ءتىلىن ءبىلۋى كەرەك. وتكەن جىلى دا بۇل ماماندىقتار بويىنشا بىردە-ءبىر قازاق توبى بولعان جوق. بيىل ولار دا «قازاقتاردى» قابىلداماۋعا بەل بايلاسا كەرەك.
سوندىقتان Narxoz ستۋدەنتتەرى تەك اعىلشىن تىلىندە ءبىلىم الادى. بىراق، ارينە، ول جەردە اعىلشىن تىلىندە ءمىنسىز سويلەيتىن ستۋدەنتتەر جوقتىڭ قاسى، بارلىق ساباقتاردى 100% اعىلشىن تىلىندە جۇرگىزەتىن مۇعالىمدەر دە جوق.
سوندىقتان، Narxoz مۇعالىمدەرى مەن ستۋدەنتتەرى بارلىق ساباقتاردىڭ ناقتى اعىلشىن جانە ورىس تىلدەرىنىڭ بەلگىلى ءبىر قوسپاسىندا وتەتىنىن مويىنداۋعا ءماجبۇر ەكەنىن ايتتى جۋرناليست.
“بۇل بارىپ تۇرعان باسسىزدىق. قازاق ءتىلىن قۇرتۋدىڭ توتە جولى. سەبەبى دۇنيەجۇزى سويلەيتىن تىلدە ساباق بەرەمىز دەگەن سىلتاۋمەن قازاق ءتىلىن تۇقىرتىپ وتىر. نارحوزعا نەگىزىنەن اۋىل بالالارى كەلىپ وقيدى. اعىلشىن ەمەس ورىسشانى ارەڭ تۇسىنەتىن جاستاردىڭ ساناسىن دا ءتىلىن دە قويىرتپاقتاپ جاتىر دەۋگە نەگىز بار.
بيىلعى قۇرىلتايدا پرەزيدەنت قازاق ءتىلىن مەڭگەرگەندەر 70 پايىزدان استى دەپ ايتتى. ال، پرەزيدەنت اكىمشىلىگىنىڭ باسشىسى ايبەك دادەباەۆ قازاقشا سويلەيتىندەر سانى 81 پايىزدى قۇرايدى دەپ سۇحبات بەرگەنى ەسىمىزدە. ەندەشە قازاق ەلىندە، قازاقتىڭ جەرىندە نارحوزدىڭ قازاقشا وقىتپايمىز دەگەنى قاي ساسقانى؟ بۇل قازاقتاردىڭ قۇقىن تاپتاۋ ەمەي نەمەنە؟
قازاق ءتىلىنىڭ مارتەبەسىن كوتەرەمىز دەگەن مەملەكەت ساياساتىنا نارحوز باسشىلارى قاساقانا قاستاندىق قىلىپ وتىر”، دەپ جازدى جۋرناليست.
