تۇركىستان وبلىسى جەتىساي اۋدانى ءبىلىم ءبولىمىنىڭ قىزمەتكەرلەرى مەملەكەتتىك قاراجاتتى اسا ءىرى مولشەردە جىمقىرۋ فاكتىسى بويىنشا كۇدىككە ءىلىندى، دەپ حابارلايدى «ادىرنا» ءتىلشىسى.
تەرگەۋ بارىسىندا اۋداندىق ءبىلىم ءبولىمىنىڭ باسشىلىعى مەن ەسەپشىلەرى وزدەرىنىڭ، سونداي-اق تۋىستارى مەن تانىستارىنىڭ ەسەپ شوتتارىنا بەلگىلەنگەن جالاقىدان جوعارى اقشا اۋدارۋ ارقىلى بيۋدجەت قاراجاتىن جىمقىرۋدىڭ قىلمىستىق سحەماسىن جاساعانى انىقتالدى.
«2021-2023 جىلدار ارالىعىندا مەملەكەتكە 4 ملرد تەڭگەدەن استام زالال كەلتىرىلگەن. وبلىس پروكۋراتۋراسىنىڭ ارنايى پروكۋرورلارى 41 قىزمەتكەردى، ونىڭ ىشىندە 2 ءبىلىم ءبولىمىنىڭ باسشىسىن، 1 باس ەسەپشى، 2 ورىنباسارىن جانە 36 ەسەپشىنى كۇدىكتى رەتىندە تانىدى»،—دەلىنگەن حابارلامادا.
اۋداننىڭ بۇرىنعى جانە قازىرگى ءبىلىم ءبولىمىنىڭ باسشىلارى ۇستاۋ يزولياتورىنا جابىلىپ، سوتتىڭ سانكتسياسىمەن قاماۋعا الىندى.
قازىرگى ۋاقىتتا قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋدىڭ بارلىق ءمان-جايلارى مەن فاكتىسىن انىقتاۋعا باعىتتالعان تەرگەۋ ارەكەتتەرى جۇرگىزىلۋدە.
