بۇگىن تاڭ اتقاننان بەرى سەمەي قالاسىندا جاكىشەۆتىڭ سوتى بولدى. "جاكىشەۆتىڭ سوتى بولادى" دەگەن حاباردى ەستىگەن بويدا حالىقتىڭ بويىندا جىلت ەتكەن ءۇمىت پايدا بولدى. "بوساتا ما، بوساتپاي ما" دەگەن بولجاممەن بۇقارانىڭ ەسى شىقتى. اقىرى سوت جاكىشەۆتى بوساتپاۋعا شەشىم شىعاردى. بۇعان سوت زالىنداعىلار تۇگەلىمەن نارازىلىق ءبىلدىرىپ، ايقايعا باستى. جاكىشەۆتىڭ جاقتاستارى سوتتىڭ نەگە بوساتپاي قويعانىڭ سۇراپ، تالاپ ەتتى. اقىرى سۋديا ەرمەك شىمىروۆ جۋرناليستەردىڭ عانا سۇراقتارىنا جاۋاپ بەردى. سوتتىڭ مالىمدەۋىنشە، ونىڭ 3-توپتاعى مۇگەدەك ەكەنىنە قاراماستان مۇحتار جاكىشەۆتى بوساتۋعا مۇلدەم نەگىز جوق. سەبەبى، مۇحتار جاكىشەۆ 6 كومپانياعا ميللياردتاعان شىعىن كەلتىرىپتى.
قاپشاعاي قالالىق سوتىنىڭ 2014 جىلعى 15 مامىرداعى ورىنداۋ قاعازدارىنا سايكەس، جاكىشەۆتەن زارداپ شەككەندەردىڭ اتىنا 99 ميلليارد تەڭگەدەن استام شىعىن وندىرىلگەن. بۇل شىعىن قىلمىس كەزىندە جاسالدى. ءدال وسى اقشانى تولىعىمەن وتەۋ تۋرالى قۇجاتتار سوتقا ۇسىنىلعان جوق. ال قورعاۋشىنىڭ "جاكىشەۆ قاپشاعاي سوتىنىڭ شەشىمىمەن تەك 2018 جىلى عانا تانىستى" دەگەن ءۋاجىن نەگىزسىز دەپ سانايمىز. سوتتىڭ شەشىمى زاڭدى كۇشىنە ەندى جانە ورىنداۋعا جىبەرىلدى", - دەدى شىمىروۆ.
الايدا "كومپانيا باسشىلارى نەگە سول كەزدە جازاعا تارتىلمادى؟" دەگەن جۋرناليستەردىڭ سۇراعىنا، سۋديا جاۋاپ بەرە المايتىنىڭ ايتىپ ءوتتى. ال مۇحتار تايجان "سوت شەشىمىنە قارسىمىز. اپەليتسياعا مىندەتتى تۇردە بەرەمىز" دەپ مالىمدەۋدە.
وسىلايشا جاكىشەۆتىڭ كىناسىز ەكەندىگىن دالەلدەيتىن 4 بىردەي ەكسپەرتيزانى نازارعا الماي، دەنساۋلىعىنىڭ ناشارلىعىن كوزگە ىلمەي وتىرعان بيلىككە دە، سوتقا دا حالىقتىڭ وكپەسى قارا قازانداي.
ەستەرىڭىزگە سالا كەتەيىك، مۇحتار جاكىشەۆ 2009 جىلدىڭ مامىر ايىندا ءوزى باسقاراتىن «قازاتومپروم» كومپانياسىنىڭ استاناداعى كەڭسەسىندە تۇتقىندالدى. ارادا ءۇش كۇن وتكەندە «مەملەكەت مۇلكىن جەكە ماقساتىنا پايدالانىپ، قازاقستاننىڭ ءىرى ۋران كەن ورىندارىنان وففشورداعى فيرمالاردىڭ مۇددەسى ءۇشىن «دوليا» الدى» دەگەن ايىپ بويىنشا قاماۋعا الىندى.
"ادىرنا" ۇلتتىق پورتالى
