جاكىشەۆ سوتى. سوت شەشىمى وزگەرىسسىز قالدى

4113
Adyrna.kz Telegram

2009 جىلى مۇحتاردىڭ توبەسىنە قارا بۇلت ءۇيىرىلدى. قامالدى. ايىپ تاعىلدى. «ۇرلاعان، جەگەن، پارا بەرگەن…» دەدى.  14 جىلعا سوتتالىپ كەتە باردى ول. ارادا 10 جىل ءوتتى. مۇحتار جاكىشەۆتىڭ دەنساۋلىعىنىڭ ناشارلاۋىنا بايلانىستى جانە زاڭ جاعىنان نەگىز جوق دەگەن ۇستانىممەن مەرزىمىنەن ەرتە بوساتۋىن سۇرادى دەپ حابارلايدى "ادىرنا" ۇلتتىق پورتالىنىڭ ءتىلشىسى.

سونىمەن بۇگىن الاشتىڭ رۋحاني استاناسىندا «قازاتومپروم» ۇلتتىق كومپانياسىنىڭ ەكس-پرەزيدەنتى مۇحتار جاكىشەۆتىڭ  سوت ءىسى جالعاسۋدا. سوت سەمەي قالاسىنداعى № 2 قالالىق سوتتا وتۋدە. ازىرگە مۇحتار جاكىشەۆتى 2009 جىلدان بەرى قورعاپ كەلە جاتقان ادۆوكات نۇرلان بەيسەكەەۆ  ايىپتالۋشى بوستاندىققا شىعۋ ءۇشىن، سۋدياعا بۇلتارتپاس دالەلدەر كەلتىرۋ ارقىلى قايتسە دە مۇحتاردى قاپاستان سۋرىرىپ الۋعا ارەكەتتەنىپ-اق باقتى. كولونيا باسشىلىعى مەن مەديتسينالىق قىزمەتكەرلەر مۇحتاردىڭ دەنساۋلىعىنا بايلانىستى سۋديادان بوساتىلۋىن ءوتىندى. ياعني كولونيا باسشىلىعى دا، دارىگەرلەر دە مۇحتاردىڭ تۇرمەدە وتىرا بەرۋى زيان ەكەنىن مالىمدەۋدە. ال ەندى سوتقا قاتىسىپ وتىرعان پروكۋرور مۇحتار جاكىشەۆتىڭ كىناسىن مويىنداماۋىنا بايلانىستى جاكىشەۆتى بوستاندىققا شىعارۋعا قارسى بولىپ وتىر. سونداي-اق مۇحتار جاكىشەۆكە استانا، الماتى، قاراعاندى، پاۆلودار قالاسىنان قولداۋ بىلدىرۋگە كەلگەن بەلسەندىلەر "مۇحتارعا بوستاندىق" دەپ سوت عيماراتىنىڭ الدىندا قولداۋ شارالارىن وتكىزىپ جاتىر. وكىنىشكە قاراي، ادۆوكاتتاردىڭ جانە وزگە دە تاراپتاردىڭ كەلتىرگەن دالەلدەرىنە قاراماستان سۋديا ەرمەك شىمىروۆ مۇحتار جاكىشەۆتى بوساتپاۋعا شەشىم شىعاردى. ياعني ارى قاراي تولىق جازا مەرزىمىن وتەگەنشە اباقتىدا بولا بەرمەك. ال مۇحتار جاكىشەۆكە قولداۋ ءبىلدىرىپ كەلگەن بەلسەندىلەر "قاشان ەل بولامىز؟", "مۇحتاردى ءولتىرىپ بىتىرەسىڭدەر!" دەپ نارازىلىقتارىن ءبىلدىرىپ، سوت زالىن بوساتپاي جاتىر.

ەستەرىڭىزگە سالا كەتەيىك، مۇحتار جاكىشەۆ 2009 جىلدىڭ مامىر ايىندا ءوزى باسقاراتىن «قازاتومپروم» كومپانياسىنىڭ استاناداعى كەڭسەسىندە تۇتقىندالدى. ارادا ءۇش كۇن وتكەندە «مەملەكەت مۇلكىن جەكە ماقساتىنا پايدالانىپ، قازاقستاننىڭ ءىرى ۋران كەن ورىندارىنان وففشورداعى فيرمالاردىڭ مۇددەسى ءۇشىن «دوليا» الدى» دەگەن ايىپ بويىنشا قاماۋعا الىندى.

"ادىرنا" ۇلتتىق پورتالى

پىكىرلەر