قىرعىزستاننىڭ ارنايى قىزمەتى ۇيىمداسقان قىلمىستىق توپتى قارجىلاندىردى دەگەن كۇدىككە ىلىنگەن قازاقستاندىق كاسىپكەر ۆلاديمير جۇمانباەۆقا قاتىستى قىلمىستىق ءىستى تەرگەۋدى توقتاتتى. بۇل تۋرالى بۇگىن، 20 ماۋسىمدا ەلدىڭ ۇلتتىق قاۋىپسىزدىك كوميتەتى ايتتى، دەپ حابارلايدى «ادىرنا» ءتىلشىسى.
قازىرگى تاڭدا «Kazakhmys Holding» جشس توپ-مەنەدجەرىنىڭ بىشكەكتە ەكەنى بەلگىلى بولدى.
«19 ماۋسىم كۇنى قۇزىرلى ورگاندار جۇمانباەۆتىڭ قاتىسۋىمەن جەدەل-ىزدەستىرۋ شارالارىن جۇرگىزدى. ناتيجەسىندە وعان تاعىلعان ايىپتار الىنىپ تاستالدى. كاسىپكەرگە قاتىستى سوتقا دەيىنگى ءوندىرىس توقتاتىلدى»، - دەلىنگەن ۇقك حابارلاماسىندا.
ايتا كەتەيىك، 5 ماۋسىمدا قىرعىزستاننىڭ ۇلتتىق قاۋىپسىزدىك كوميتەتى قازاقستاندىق بيزنەسمەن، «Kazakhmys Holding» جشس-نىڭ توپ-مەنەدجەرى ۆلاديمير جۇمانباەۆقا حالىقارالىق ىزدەۋ جاريالادى. ميللياردەر قىرعىزستاندىق بىرلەسكەن قىلمىستىق ۇيىم مۇشەسى اسانبەك كولباەۆتىڭ جۇمىسىن قارجىلاندىردى دەگەن كۇدىككە ىلىنگەن ەدى. سول كۇنى حولدينگتەگىلەر ۆلاديمير جۇمانباەۆتىڭ ۇقمك حابارلاماسىندا كورسەتىلگەن قۇرىلىمدارعا قاتىسى جوق ەكەنىن مالىمدەدى.
Forbes اقپاراتىنا سۇيەنسەك، ۆلاديمير جۇمانباەۆ قازاقستانداعى ەڭ داۋلەتتى ادامدار تىزىمىندە 25-ورىندا تۇر. وعان «التىن الماس» اق 20% تيەسىلى. سونداي-اق، «قاراجىرا» اق 20%، «بەنكالا» تاۋ-كەن كومپانياسى، «Ronson-2000» جشس جانە «Vertex Holding» تيەسىلى.
