اتىراۋ وبلىسىندا ايەلگە قول كوتەرگەن شەنەۋنىككە قاتىستى ۇكىم شىقتى، دەپ حابارلايدى "ادىرنا" ۇلتتىق پورتالى.
ماقات اۋدانىنىڭ اكىمى بۇرىنعى ايەلىن سوققىعا جىققانى تۋرالى حابارلانعان ەدى. №2 سوتىندا بۇرىنعى ايەلى اقمارال ۇمبەتقاليەۆانى جۇيەلى تۇردە ۇرىپ-سوقتى دەپ ايىپتالعان.
“جانجال كەزىندە رينات يبراگيموۆ جابىرلەنۋشىنىڭ وزىنە ماتەريالدىق تاۋەلدى ەكەنىن پايدالانىپ، وسى نەگىزدە جانجال شىعارىپ، ايەلىنىڭ وڭ يىعىنان ۇستاپ، ەسىكتى جاۋىپ، بولمەگە كىرگىزگەن. ەشكىمنىڭ كەدەرگى جاسامايتىنىنا كوز جەتكىزىپ، ونى ەدەنگە قۇلاتقان جانە سول جاق سانىنان بىرنەشە رەت تەپكىلەگەن. سونىڭ سالدارىنان جابىرلەنۋشى اقمارال ۇمبەتقاليەۆانىڭ 5-ومىرتقاسى سىنىپ، ورتاشا اۋىرلىقتاعى زاقىم العان”، – دەلىنگەن حابارلامادا.
سوتتالۋشىنىڭ كىناسى جابىرلەنۋشىنىڭ ايعاقتارىمەن، ساراپتاما قورىتىندىسىمەن جانە باسقا دا دالەلدەمەلەرمەن دالەلدەندى. قىلمىستىق كودەكستىڭ 107-بابى 2-بولىگىنىڭ 3-تارماعى “ماتەريالدىق نەمەسە وزگە دە تاۋەلدىلىكتە بولعان ادامعا قاتىستى دەنساۋلىققا قاساقانا اۋىرلىعى ورتاشا زيان كەلتىرۋ” بويىنشا سوتقا تارتىلعان ەدى.
ايتا كەتەيىك، 2023 جىلعى 31 مامىردا اتىراۋ قالاسىندا پاتەردە جابىرلەنۋشى مەن سوتتالۋشىنىڭ اراسىندا جانجال بولعان.
