ەلىمىزدە تۇرمىستىق زورلىق-زومبىلىققا قاتىستى زاڭعا قارسى پەتيتسيا جاريالانعان. قر بالا قۇقىقتارى جونىندەگى ۋاكىل دينارا زاكيەۆا تۇمىستىق زورلىق-زومبىلىققا قاتىستى زاڭعا قارسى ونلاين پەتيتسيا اۆتورلارىنىڭ ءسوزىن جوققا شىعاردى، دەپ حابارلايدى "ادىرنا" ۇلتتىق پورتالى.
ۋاكىل دينارا زاكيەۆا ءوز سوزىندە Facebook جەلىسىندەگى پاراقشاسىندا جاريالادى. ۋاكىلدىڭ سوزىنشە، پەتيتسيا اۆتورىنىڭ نەگىزگى يدەياسى — بۇل زاڭ تاربيە پروتسەسىن قىلمىستىق جاۋاپكەرشىلىككە تارتادى، بالالاردى تارتىپ الۋدىڭ قاراپايىم مەحانيزمىن ەنگىزەدى جانە ازاماتتاردىڭ جەكە ىسىنە ارالاسۋ قۇقىعىنا يە قۇرىلىم قۇرايدى.
«بۇل مۇلدەم وتىرىك! بۇل زاڭدا بالالاردى تارتىپ الۋ تۋرالى بىردە-ءبىر نورما جوق. وسى زاڭ ارقىلى ەل پرەزيدەنتى قاسىم-جومارت توقاەۆ قوعامدا زورلىق-زومبىلىققا جول بەرمەۋ مادەنيەتىن دامىتۋ، ادامدى، ونىڭ ىشىندە بالانى ۇرىپ-سوعۋعا جول بەرمەيتىن، زاڭدىلىق پەن ءتارتىپ الدىڭعى قاتاردا بولاتىن قوعام قۇرۋ مىندەتىن قويدى»، — دەدى زاكيەۆا.
زاكيەۆا زاڭعا قارسى شىققانداردى داعدارىس ورتالىعىندا نەمەسە وتباسىن قولداۋ ورتالىعىندا ەرىكتى بولۋعا شاقىردى.
«ەلىمىزدىڭ 220 ەلدى مەكەنىن ارالاپ شىقتىق. اۋەلى بۇل زاڭنىڭ قاجەت ەمەستىگىن العا تارتپاس بۇرىن، اۆتورلارعا دا سول جولمەن ءجۇرىپ ءوتۋدى ۇسىنامىن. ءبارىمىز دە قالام تەربەپ، ءسوز ساپتاي الامىز. الايدا سوڭعى ناتيجە تەك ناقتى ءىس-ارەكەت، سوعان جاسالعان قادام مەن كۇندەلىكتى جۇمىس ارقىلى عانا كورىنەدى. قاۋىپسىز قوعامدا عانا دامي الاتىن ەلدىڭ اماندىعى تۋرالى ءبارىمىز ايتىپ ءجۇرمىز. ەلدىڭ اماندىعى وتباسىنىڭ، ءاربىر قوعام مۇشەسىنىڭ، سونىڭ ىشىندە بالانىڭ اماندىعىنان تۇرادى»، - دەپ جازدى بالا قۇقىقتارى جونىندەگى ۋاكىل دينارا زاكيەۆا.
