قازاقستاندىقتارعا “حانزادا جۋمونگ” سەريالىمەن تانىلعان كورەي اكتەرى سون يل گۋك Kazinform.kz سايتىنا سۇحبات بەردى، دەپ حابارلايدى “ادىرنا” ۇلتتىق پورتالى.
سون يل گۋك قازاقستانعا ەكىنشى مارتە ساپارلاعانىن ايتتى:
“وسىعان دەيىن كەلگەندە دە، بۇل جولى دا ۋاقىت وتە تاپشى بولدى. سوندىقتان قازاقستان تۋرالى كوپ مالىمەت الا المادىم، ءوز كوزىممەن كورە المادىم. بىراق كەلەردىڭ الدىندا كوپ اقپارات وقىپ، مادەنيەتى مەن تابيعاتى تۋرالى، تۋريستىك ورىندارى تۋرالى ءبىرتالاي ىزدەندىم. الماتىنىڭ ىرگەسىندەگى شىمبۇلاقتا شاڭعى تەپكىم كەلىپ ەدى. بۇل جولى دا ۋاقىت كەستەمنىڭ تىعىزدىعىنا بايلانىستى ويعا العانىمدى ىسكە اسىرا الماي كەتىپ بارا جاتقانىم وتە وكىنىشتى” دەدى ول.
سونىمەن قاتار كورەي اكتەرى قازاقستان تابيعاتى جايلى ەرەكشە اسەرىمەن ءبولىستى:
“كورەيادا ادام سانى كوپ بولعانىمەن، قازاقستانعا قاراعاندا جەرى شاعىن. بوس جەر جوق دەۋگە بولادى. قايدا بارساڭ دا عيماراتقا تولى. سول ءۇشىن بىزدە تاريحي فيلمدەر تۇسىرەتىن ورىن تاپشى. ال مۇندا جەر كەڭ، سايكەسىنشە، لوكاتسيا كوپ. تاۋ كەرەك پە، ورمان كەرەك پە، ءشول كەرەك پە، كول كەرەك پە – ءبارى بار. سونى بايقاپ وسىنداي تاريحي فيلم تۇسىرسە عوي دەگەن ويعا قالدىم. ارينە، قازاقستان رەجيسەرلەرىنەن ۇسىنىس العانىم جاقسى عوي، بىراق كورەيالىق ءتۇسىرۋ توبى قازاقستان جەرىنە كەلىپ، كينو تۇسىرسە قالاي بولار ەدى دەگەن ويمەن كەتىپ بارامىن. بۇل – ناقتى جوسپار ەمەس. وسى جولعى ساپاردا سانامدا وسىنداي ءبىر وي جىلت ەتتى” دەدى سون يل گۋك.
