كوكشەتاۋدا وتكەن «تالانتتار الەمى» وبلىستىق بالالار فەستيۆالى جازدىڭ ايتۋلى مادەني شارالارىنىڭ ءبىرى بولدى. ونى اقمولا وبلىسىنىڭ مادەنيەت باسقارماسى جانىنداعى وبلىستىق حالىق شىعارماشىلىعى جانە مادەني دەمالىس ورتالىعى ۇيىمداستىردى.
بۇل كۇنى ابىلاي حان الاڭى ايشىقتى بوياۋلار مەن سىڭعىرلاعان اۋەندەرگە تولى بولدى. جاس بيشىلەر مەن ۆوكالشىلار ساحنادا ونەر كورسەتۋگە قىزۋ دايىندالىپ، ءبىر-بىرىمەن تانىسىپ، قوشەمەتپەن قولداۋ كورسەتتى.
مەملەكەتتىك شىعارماشىلىق تاپسىرىستىڭ ارقاسىندا قالالار مەن وبلىس ورتالىقتارىندا عانا ەمەس، شالعاي اۋىلدارداعى بالالار ۇيىرمەلەردە وقۋعا مۇمكىندىك الدى.
وسى باعدارلاما بويىنشا جۇمىس ىستەيتىن ۇيىرمەلەردىڭ تاربيەلەنۋشىلەرى اۋداندىق، قالالىق، وبلىستىق، رەسپۋبليكالىق جانە حالىقارالىق فەستيۆالدار مەن بايقاۋلارعا قاتىسىپ، جەڭىمپاز، جۇلدەگەر، ديپلومانت اتانىپ ءجۇر.
كوكشەتاۋدا وبلىستىق «تالانتتار الەمى» بالالار فەستيۆالىندە 500-دەن استام بالا ءوز جەتىستىكتەرىن كورسەتۋگە جينالدى.
فەستيۆالدىڭ كونتسەرتتىك باعدارلاماسىنا اۋدانداردان، كوكشەتاۋ، قوسشى جانە ستەپنوگورسك قالالارىنان بالالار ۇجىمدارى قاتىستى. «New star» ءسان تەاترى «Fashion Barbie» دەفيلەسىن كورسەتسە، ەرەيمەنتاۋ اۋدانى ەركىنشىلىك اۋىلىنىڭ جاس بيشىلەرى «ماكارەنانى» ورىندادى. «Adagio» بي مەكتەبى (كوكشەتاۋ ق.), «ونەر» شىعارماشىلىق ورتالىعى (قوسشى ق.), «انترە@رادۋگا» بي ستۋدياسىنىڭ (دەرجاۆينسك ق.) حالىقارالىق، رەسپۋبليكالىق فەستيۆالدار مەن بايقاۋلاردىڭ جەڭىمپازدارى ونەر كورسەتتى.
سونداي-اق فەستيۆال اياسىندا «كەسكىندەمە جانە سىزۋ»، «بيسەر»، «كيىمدەردى مودەلدەۋ، ءپىشۋ جانە تىگۋ» شىعارماشىلىق ۇيىرمەلەرىمەن اينالىساتىن بالالاردىڭ 100-دەن استام جۇمىستارى بەينەلەنگەن جانە ساندىك-قولدانبالى ونەر كورمەسى ۇيىمداستىرىلدى.
بارلىق فەستيۆال قاتىسۋشىلارى العىس حاتتارمەن جانە ديپلومدارمەن ماراپاتتالدى.
«تالانتتار الەمى» فەستيۆالى ەلىمىزدە وسكەلەڭ ۇرپاقتىڭ دامۋىنا ۇلكەن كوڭىل ءبولىنىپ جاتقاندىعىنىڭ جارقىن دالەلى.
