Kókshetaýda ótken «Talanttar álemi» oblystyq balalar festıvali jazdyń aıtýly mádenı sharalarynyń biri boldy. Ony Aqmola oblysynyń mádenıet basqarmasy janyndaǵy oblystyq halyq shyǵarmashylyǵy jáne mádenı demalys ortalyǵy uıymdastyrdy.
Bul kúni Abylaı han alańy aıshyqty boıaýlar men syńǵyrlaǵan áýenderge toly boldy. Jas bıshiler men vokalshylar sahnada óner kórsetýge qyzý daıyndalyp, bir-birimen tanysyp, qoshemetpen qoldaý kórsetti.
Memlekettik shyǵarmashylyq tapsyrystyń arqasynda qalalar men oblys ortalyqtarynda ǵana emes, shalǵaı aýyldardaǵy balalar úıirmelerde oqýǵa múmkindik aldy.
Osy baǵdarlama boıynsha jumys isteıtin úıirmelerdiń tárbıelenýshileri aýdandyq, qalalyq, oblystyq, respýblıkalyq jáne halyqaralyq festıvaldar men baıqaýlarǵa qatysyp, jeńimpaz, júldeger, dıplomant atanyp júr.
Kókshetaýda oblystyq «Talanttar álemi» balalar festıvalinde 500-den astam bala óz jetistikterin kórsetýge jınaldy.
Festıvaldiń konerttik baǵdarlamasyna aýdandardan, Kókshetaý, Qosshy jáne Stepnogorsk qalalarynan balalar ujymdary qatysty. «New star» sán teatry «Fashion Barbie» defılesin kórsetse, Ereımentaý aýdany Erkinshilik aýylynyń jas bıshileri «Makarenany» oryndady. «Adagio» bı mektebi (Kókshetaý q.), «Óner» shyǵarmashylyq ortalyǵy (Qosshy q.), «Antre@Radýga» bı stýdııasynyń (Derjavınsk q.) halyqaralyq, respýblıkalyq festıvaldar men baıqaýlardyń jeńimpazdary óner kórsetti.
Sondaı-aq festıval aıasynda «Keskindeme jáne syzý», «Bıser», «Kıimderdi modeldeý, pishý jáne tigý» shyǵarmashylyq úıirmelerimen aınalysatyn balalardyń 100-den astam jumystary beınelengen jáne sándik-qoldanbaly óner kórmesi uıymdastyryldy.
Barlyq festıval qatysýshylary alǵys hattarmen jáne dıplomdarmen marapattaldy.
«Talanttar álemi» festıvali elimizde óskeleń urpaqtyń damýyna úlken kóńil bólinip jatqandyǵynyń jarqyn dáleli.
