اقش پرەزيدەنتى دجو بايدەن مەن ۋكراينا پرەزيدەنتى ۆلاديمير زەلەنسكي يتالياداعى "ۇلكەن جەتىلىك" (G7) ەلدەرىنىڭ سامميتىندە ۋكراينانىڭ قاۋىپسىزدىگى مەن ۇزاق مەرزىمدى قولداۋى بويىنشا ىنتىماقتاستىق تۋرالى كەلىسىمگە قول قويدى. كەلىسىمگە قول قويۋ ءراسىمىنىڭ ۆيدەوسىن امەريكاندىق جانە ۋكراينالىق جۋرناليستەر تاراتقان، دەپ حابارلايدى “ادىرنا” ۇلتتىق پورتالى.
Daily Mail باسىلىمىنىڭ جازۋىنشا، بۇل كەلىسىم بۇرىنعى پرەزيدەنت دونالد ترامپ قاراشاداعى سايلاۋدا جەڭىسكە جەتسە دە، بولاشاق اقش اكىمشىلىگىنىڭ ۋكرايناعا قولداۋ كورسەتۋى ءۇشىن جاسالعان.
كەلىسىم ۋكراينانىڭ ناتو-عا بولاشاق مۇشەلىگىنە "كوپىر" رەتىندە قاراستىرىلادى جانە ون جىلعا سوزىلادى.
قۇجاتقا نە كىرەدى؟
- ۋكراين اسكەريلەرىن وقىتۋ: اقش ۋكراين اسكەريلەرىن وقىتۋدى جانە جاتتىقتىرۋدى جالعاستىرادى.
- اسكەري ونەركاسىپتى نىعايتۋ: اسكەري ونەركاسىپ سالاسىنداعى ەلدەر اراسىنداعى ىنتىماقتاستىقتى كەڭەيتۋ.
- بارلاۋ دەرەكتەرىمەن الماسۋ: بارلاۋ اقپاراتىمەن الماسۋدى تەرەڭدەتۋ.
- سونىمەن قاتار، ۋكرايناعا شابۋىل جاسالعان نەمەسە مۇنداي شابۋىل قاۋپى تونگەن جاعدايدا، كيەۆ پەن ۆاشينگتون وكىلدەرى اقش-تىڭ ىقتيمال كومەگىن تالقىلاۋ ءۇشىن 24 ساعات ىشىندە شۇعىل كەزدەسۋگە جينالۋعا مىندەتتەنەدى.
ايتا كەتسەك، كەلىسىم اقش-تىڭ ۋكراينانى قورعاۋ ءۇشىن اقش اسكەري كۇشتەرىن پايدالانۋ جونىندەگى مىندەتتەمەلەرىن قامتىمايدى جانە ۆاشينگتوننىڭ كيەۆ الدىنداعى قارجىلىق مىندەتتەمەلەرىن قامتىمايدى.
قول قويىلعاننان كەيىنگى ءباسپاسوز ءماسليحاتىندا دجو بايدەن "ۇلكەن جەتىلىك" ەلدەرى وسى جىلى ۋكرايناعا رەسەيدىڭ مۇزداتىلعان اكتيۆتەرىنىڭ پايىزىنا 50 ميلليارد دوللار ءبولۋدى ماقۇلداعانىن مالىمدەدى، بۇل اقش-تىڭ باستاماشىسى بولعانىن اتاپ ءوتتى.
بۇقارالىق اقپارات قۇرالدارىنىڭ حابارلاۋىنشا، بۇل كەلىسىم ۋكراينانىڭ ارمياسىن دامىتۋعا كومەكتەسۋ ءۇشىن ۇزاق مەرزىمدى كۇش سالۋعا نەگىز بولادى جانە ۋكراينانىڭ ناتو-عا تۇپكىلىكتى مۇشەلىگىنە جاسالعان قادام بولماق.
