جىل سايىن 14 ماۋسىمدا الەمنىڭ بارلىق ەلدەرى دۇنيەجۇزىلىك قان دونورى كۇنىن اتاپ وتەدى. وسى مەرەكەگە وراي ترانسفۋزيولوگيا عىلىمي-وندىرىستىك ورتالىعىندا بۇقارالىق اقپارات قۇرالدارىنىڭ وكىلدەرى ءۇشىن ءباسپاسوز تۋرى ءوتتى. ءىس-شارانى قر دەنساۋلىق ساقتاۋ مينيسترلىگىنىڭ قولداۋىمەن تعوو ءباسپاسوز قىزمەتى ۇيىمداستىردى.
ورتالىق قىزمەتكەرلەرى باق وكىلدەرىنە قان تاپسىرۋدىڭ پايداسى، دونورلىق ماتەريالدىڭ قاۋىپسىزدىگى تۋرالى ءتۇسىندىرىپ، تعوو زەرتحانالارىنىڭ جۇمىسىن جانە دونورلىق قاندى الۋ جانە وڭدەۋ پروتسەستەرىن كورسەتتى.
[caption id="attachment_201418" align="alignleft" width="2560"]
+[/caption]
«ءبىزدىڭ دونورلىق قاندى زەرتحانالىق تەستىلەۋ جانە قايتا وڭدەۋ تەحنولوگيالارىمىز اقش پەن ەۋروپاداعى قولدانىلاتىن تەحنولوگيالارمەن بىردەي. حالىقارالىق ستاندارتتاردى ەنگىزۋ ەرىكتى تۇردەگى قان دونورلىعىن دامىتۋعا، ينفەكتسيالاردى انىقتاۋ ماقساتىنداعى قاننىڭ زەرتحانالىق سكرينينگ جۇيەسىن جەتىلدىرۋگە مۇمكىندىك بەردى. 2013 جىلدان باستاپ سكرينينگ يفت جانە پتر ەكى ادىسىمەن جۇرگىزىلەدى. 2010 جىلدان باستاپ ءبىزدىڭ ورتالىقتىڭ بازاسىندا تولىق اۆتوماتتاندىرىلعان اناليتيكالىق جابدىقتى پايدالانا وتىرىپ، ەكى ساتىلى سكرينينگ قولدانىلادى. بۇل قان دياگنوستيكاسىندا قاتەلىكتەر جىبەرۋ فاكتىلەرىن بولدىرمايدى. تمد اۋماعىندا مەملەكەتتىك دەڭگەيدەگى زەرتحانالىق دياگنوستيكانىڭ بۇل ءادىسى تەك قازاقستاندا قولدانىلادى»، - دەپ اتاپ ءوتتى ترانسفۋزيولوگيا عىلىمي-وندىرىستىك ورتالىعىنىڭ باسقارما توراعاسى سانيا ءابدىراحمانوۆا.
بيىلعى جىلى جاھاندىق ناۋقان «20 جىل رياسىز قۋانىش: راحمەت سىزگە، دونور!» ۇرانىمەن وتۋدە. ورتالىق دارىگەرلەرى قان، پلازما جانە ترومبوتسيتتەر دونورلارىنا ريزاشىلىقتارىن ءبىلدىرىپ، ادامداردى جاھاندىق قان تاپسىرۋ قوزعالىسىنا قاتىسۋعا شاقىردى.
