پرەمەر-ءمينيستردىڭ ورىنباسارى سەرىك جۇمانعارين «شەگىرتە — حالال ءونىم» دەگەن اتىشۋلى مالىمدەمەسىنە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
«الەۋمەتتىك-ساياسي ءومىرىمىز شيەلەنىسىپ جاتقاندىقتان، ازداپ كوڭىل كوتەرۋ ءۇشىن
وسىنداي مالىمدەمەلەر جاسايمىن. دەگەنمەن، مەن ەشكىمگە شەگىرتكە جەۋگە بولادى ايتقان ەمەسپىن. اڭگىمە اياسىندا ونىڭ حالال ءونىم ەكەنىن ايتتىم. بىلۋىمشە، بەلگىلى ءبىر اقپارات قۇرالدارى بۇل فاكتىلەردى تەكسەرىپ، راستادى. مەن جاۋاپتى مەملەكەتتىك قىزمەتكەرمىن جانە، ارينە، ءوز ازاماتتارىمىزعا ەشقاشان شەگىرتكە جەۋدى ۇسىنبايمىن. قۇدايعا شۇكىر، بىزدە ازىق-تۇلىك قاۋىپسىزدىگى قامتاماسىز ەتىلگەن»، - دەدى ول.
ايتا كەتەيىك، بۇعان دەيىن جۇمانعارين قازاقستاندا شەگىرتكەلەردىڭ قاپتاۋى جايلى ءسوز قوزعاپ، ولاردى تۇتىنۋ حالال ەكەنىن ايتقان ەدى. ال 11 ماۋسىمدا دەنساۋلىق ساقتاۋ ءمينيسترى اقمارال ءالنازاروۆا بۇل مالىمدەمەگە قاتىستى پىكىر ءبىلدىردى.
«ءاربىر مەملەكەتتىڭ ءوزىنىڭ ءداستۇرى بار. قازاققا ءتان ەمەس ءداستۇر دەپ بىلەمىن. سوندىقتان قازىر ونىڭ زيانى، پايداسى بار، حالال، حالال ەمەس دەپ ايتۋعا دايىن ەمەسپىن. بۇل مەنىڭ قۇزىرەتىمە كىرمەيدى»، - دەدى ول.
