اتىراۋداعى «دينا» بازارىندا ەكى ەر ادامنىڭ اراسىندا جانجال تۋىپ، سوڭى كىسى ولىمىمەن اياقتالدى، دەپ حابارلايدى "ادىرنا" ۇلتتىق پورتالى.
كۋاگەرلەردىڭ ايتۋىنشا، جانجال اماندىق ساعىنعاليەۆ ەسىمدى جەرگىلىكتى كاسىپكەردىڭ ابايسىزدا باسقا ەر ادامنىڭ كولىگىن سىرىپ كەتكەن سوڭ باستالعان. تۇرعىندار سوققىعا جىققان ەر ادامنىڭ ساقالدى ەكەنىن ايتادى.
بەينەباقىلاۋ كامەراسىندا زارداپ شەككەن كولىكتىڭ جۇرگىزۋشىسى مارقۇمنىڭ بەتىنە توعىزىنشى سوققى بەرگەندە، ەر ادام قۇلاپ كەتكەن. بىراق اۋىر سوققى العان ادام قايتا ورنىنان كوتەرىلگەن. ال ەر ادامنىڭ ونىنشى سوققىسى بىردەن ادام ولىمىنە اكەلگەن. ال اگرەسسور بىردەن وقيعا ورنىنان اسىعىس كەتىپ قالعان.
قايعىلى وقيعا 11 ماۋسىم كۇنى كۇندىز بولعان. الايدا سوققىعا جىعىلعان ازاماتقا ەشكىم كومەكتەسۋگە اسىقپاعان.
جەلىدەگى توپتاردا تاراعان بەيرەسمي دىبىستىق حابارلامادا سوققىعا جىعىلعان ازاماتتىڭ جەرگىلىكتى كاسىپكەر ەكەنى ايتىلعان. ول سول كۇنى ايەلىمەن بىرگە بازاردان تاۋار الۋعا كەلگەن.
اتىراۋ وبلىستىق پوليتسيا دەپارتامەنتى بۇل فاكتى بويىنشا قىلمىستىق ءىس قوزعالىپ، تەرگەۋ ءجۇرىپ جاتقانىن حابارلادى.
«كۇدىكتى ۋاقىتشا ۇستاۋ يزولياتورىنا جەتكىزىلدى»، - دەلىنگەن حابارلامادا.
ال الماس التاي ەسىمدى جەلى قولدانۋشىسى مارقۇمنىڭ ءولىمى قالاي بولعانىن جازدى.
"اتىراۋ وبلىسى، قىزىلقوعا اۋدانى دەپ تۇر عوي، وقيعا سول اتىراۋدا بولسا كەرەك. اۋىلدان قالاعا كەلگەن، بازاردان جۇك تيەپ، ەلگە قايتپاق بوپ تۇرعان اماندىق ساعىنعاليەۆ مۇحتار احمەدوۆتىڭ ەسكى مەرسىنىڭ ەسىگىن مايىستىرىپ، ءماشىننىڭ ەسىگى جابىلماي قالادى.
اماندىق اعانىڭ قالتاسىندا قارايعان اقشا بولعان، ءىستى سول جەردە جاۋىپ كەتەتىن دە مۇمكىندىگى بولعان. الايدا، مۇحتار احمەدوۆ سويلەسپەي، بىردەن جۇدىرىققا جۇگىنگەن. اماندىق اعانىڭ جاسى 60 قا تاياپ قالعان، ال، مۇحتار 40 قا دا جەتپەپتى...
التىنشى الدە جەتىنشى جۇدىرىق سىلتەنگەن سوڭ اماندىق اعا ورنىنان تۇرا الماي قالعان. اينالاداعىدار جج شاقىرعان، اعانىڭ قىزى كەلگەن جۇگىرىپ، دارىگەرلەر اماندىق اعانى كولىككە سالىپ جاتقاندا مۇحتار ءالى بوقتاپ، ايعايلاپ جۇرگەن.
سودان ءبىراز وتكەندە اماندىق اعانىڭ تۋمالاستارى - جىگىتتەر بازارعا كەلگەن، ءمان جايدى بىلگەن. مۇحتار "مەن ءبىر-اق رەت ۇردىم، شال قۇلاپ قالدى، باسى تاسقا سوقتى، تۇرا الماي قالدى" دەگەن...
الايدا، بازار الدىنداعى كامەراعا ءبارى انىق تۇسكەن، احمەدوۆ اماندىق اعانى بىرنەشە رەت ۇرعان، جەتەكتەپ تاسا جەرگە اكەلىپ، تاعى ۇرعان", - دەلىنگەن جازبادا.
