دەنساۋلىق ساقتاۋ ءمينيسترى قازاقستاندا جاڭا ۋاقىتتىڭ حالىققا اسەرى تۋرالى ايتتى، دەپ حابارلايدى “ادىرنا” ۇلتتىق پورتالى kursiv.media-عا سىلتەپ.
مينيستر اقمارال ءالنازاروۆا ءۇش اي بۇرىن اۋىسقان بىرىڭعاي ۋاقىت بەلدەۋىنىڭ قازاقستاندىقتاردىڭ دەنساۋلىعىنا اسەرى تۋرالى سۇراققا جاۋاپ بەردى.
«ءسىز «جاڭا ۋاقىت بەلدەۋى حالىقتىڭ دەنساۋلىعىنا وڭ اسەر ەتەدى دەپ ەسەپتەيمىن» دەگەن بولاتىنسىز. بىراق بۇرىنعى ۋاقىت بەلدەۋىن قايتارۋ ءۇشىن پەتيتسياعا قول قويىپ جاتقان ازاماتتار بار. مىسالى، شىعىس قازاقستان وبلىسىنداعى تۇرعىنداردى ايتۋعا بولادى. وندا ۋاقىت بەلدەۋىنىڭ وزگەرۋىنە بايلانىستى تۇرعىندارعا پسيحولوگيالىق، فيزيكالىق جۇكتەمە تۇسكەن. «ەرتەرەك تۇراتىن بولدىق، ۇيقىمىز قانبايدى، جۇمىسىمىز ونبەيدى» دەپ تۇرعىندار شاعىمدانىپ جاتىر. ءسىزدىڭ قازىرگى ويىڭىز قانداي؟»، - دەپ باق وكىلى ۇكىمەتتە وتكەن ءباسپاسوز ءماسليحاتىندا مينيسترگە ساۋال جولداعان.
دەنساۋلىق ءمينيسترى ءالنازاروۆا بىرىڭعاي ۋاقىت بەلدەۋىنە كوشۋ عىلىمي دەرەكتەردەن كەيىنگى شەشىم بولعانىن ايتادى. مينيستر جاڭا ۋاقىتتىڭ تۇرعىندار دەنساۋلىعىنا ەشقانداي كەرى اسەرى بولماعان دەپ ەسەپتەيتىنىن دە اتاپ ءوتتى.
«نەگىزى ساعات بەلدەۋى ماسەلەسى بىرنەشە جىلدان بەرى تالقىلاندى. بۇل جۇمىسقا ەلىمىزدەگى عىلىمي ورتالىقتار تارتىلدى. مىسالى، فيزيولوگيا ينستيتۋتى، فەسەنكوۆ اتىنداعى استروفيزيكا ينستيتۋتى. سوندىقتان بۇل شەشىم عىلىمي دەرەكتەرگە سۇيەنە وتىرىپ قابىلداندى. ەكىنشىدەن، ساعات بەلدەۋى وزگەرگەننەن كەيىن ەمحانالار مەن اۋرۋحانالارعا ناۋقاستاردىڭ ايتارلىقتاي ءتۇسىپ جاتقانىن بايقاپ وتىرعان جوقپىز. بۇگىنگى تاڭدا دەنساۋلىققا كەرى اسەر ەتكەن جوق دەپ ايتۋعا نەگىز بار»، - دەپ جاۋاپ بەردى مينيستر.
ەسكە سالا كەتەيىك، 7 ماۋسىم كۇنى جاڭا ۋاقىت بەلدەۋىنە بايلانىستى پەتيتسياعا 50 000 ادام قول قويعانى تۋرالى جازعان ەدىك.
