كوكشەتاۋ، قوسشى، ششۋچينسك جانە زەرەندى اۋدانىنىڭ 200 وتباسى جاڭا ۇيلەردە ارلەنگەن پاتەرلەردىڭ كىلتتەرىن الادى.
اقمولا وبلىسى اكىمىنىڭ باستاماسىمەن وسى جىلدان باستاپ حالىقتىڭ الەۋمەتتىك وسال توپتارى ساناتىنا ارنالعان تۇرعىن ءۇي سالىنبايدى، ولار نارىقتىق قۇنى بويىنشا باسەكەلەستىك نەگىزدە ساتىپ الىناتىن بولادى. تالاپتارعا سايكەس پاتەرلەر ارلەنگەن جانە جايلىلىعى جوعارى بولۋى كەرەك. باعدارلاماعا قاتىسۋشىلار - جەرگىلىكتى قۇرىلىس كومپانيالارى.
بۇل جوبا ۇلكەن قاجەتتىلىگى بار ەلدى مەكەندەردە ىسكە اسىرىلا باستادى.
اقمولا وبلىسىنىڭ اكىمى مارات احمەتجانوۆ قوعام بەلسەندىلەرى مەن بلوگەرلەرمەن بىرگە ساتىپ الۋعا ارنالعان پاتەرلەردى ارالاپ كوردى.
«بۇگىنگى تاڭدا قالا اكىمدىگى 129 پاتەر ساتىپ الۋعا كونكۋرس وتكىزدى. ونىڭ قورىتىندىسى شىعارىلعاننان كەيىن وسى ايدىڭ سوڭىنا دەيىن تۇرعىندارعا كىلتتەرىن تابىستايمىز. ءبىزدىڭ باستى تالابىمىز - پاتەرلەرگە بىردەن قونىستانۋعا بولاتىنداي جوندەۋ جۇمىستارىن ساپالى جۇرگىزۋ كەرەك. جۇمىستى باقىلاۋ ءۇشىن قوعام قايراتكەرلەرى مەن مۇددەلى مەملەكەتتىك ورگاندار قاتارىنان كوميسسيا قۇرىلادى»، - دەپ اتاپ ءوتتى م.احمەتجانوۆ.
ايتا كەتەيىك، وسى جىلدىڭ سوڭىنا دەيىن وبلىس بويىنشا بارلىعى 841 پاتەر بەرۋ جوسپارلانىپ وتىر.
