مەملەكەت باسشىسى قاسىم-جومارت توقاەۆ «ورگانيكالىق ءونىم ءوندىرىسى جانە اينالىمى تۋرالى» قازاقستان رەسپۋبليكاسىنىڭ زاڭىنا قول قويدى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
زاڭ تابيعي رەسۋرستاردى ساقتاۋعا جانە ولاردى ۇتىمدى پايدالانۋعا، سونداي-اق دۇرىس تاماقتانۋ داعدىسىن قالىپتاستىرىپ، ورگانيكالىق ءونىم نارىعىن دامىتۋعا باعىتتالعان.
زاڭعا بىرقاتار جاڭا ەرەجە ەنگىزىلگەن:
بىرىنشىدەن، زاڭدا ورگانيكالىق ءونىم ءوندىرىسى مەن اينالىمى سالاسىنداعى ۇلتتىق زاڭنامانىڭ ماقساتتارى مەن مىندەتتەرى قايتا قارالعان.
ەكىنشىدەن، ورگانيكالىق ءونىم وندىرۋشىلەردىڭ اياسى كەڭەيتىلگەن. ياعني، ولاردىڭ قاتارىنا جەكە جانە زاڭدى تۇلعالاردان بولەك، ورگانيكالىق ءونىم وندىرۋمەن اينالىساتىن بىرلەستىكتەردى (جاي سەرىكتەستىكتەردى) جاتقىزۋعا بولادى.
ۇشىنشىدەن، زاڭدا ورگانيكالىق ءونىم وندىرۋگە كوشۋ شارتتارى قاراستىرىلعان جانە ونىڭ وندىرىسىنە، تاڭبالانۋىنا جانە اينالىمىنا قاتىستى تالاپتار بەكىتىلگەن.
تورتىنشىدەن، ورگانيكالىق ءونىم ءوندىرىسى سالاسىنداعى حالىقارالىق تاجىريبەلەر مەن ستاندارتتارعا سايكەستەندىرۋ ماقساتىندا وندىرىلگەن ءونىمنىڭ ساپاسى ءۇشىن ەرىكتى قاتىسۋ، ىشكى باقىلاۋ، سونداي-اق ۇجىمدىق جاۋاپكەرشىلىك قاعيداتتارىنا نەگىزدەلگەن بىرلەسكەن كەپىلدىكتەر جۇيەسىن (PGS) قۇرۋ جانە ونىڭ جۇمىسى جونىندەگى ەرەجەلەر قامتىلعان.
سونداي-اق مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ورگانيكالىق ءونىم ءوندىرىسى جانە اينالىمى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
زاڭنىڭ ءماتىنى باسپاسوزدە جاريالانادى.
