جاقىندا سەمەي قالاسىنىڭ ءباسپاسوز ورتالىعىندا تۇرعىن ءۇي – كوممۋنالدىق شارۋاشىلىق جانە تۇرعىن ءۇي ينسپەكتسياسى ءبولىم باسشىسىنىڭ قاتىسۋىمەن ءباسپاسوز ءماسليحاتى ءوتتى. بريفينگ بارىسىندا ءبولىم باسشىسى وسى ۋاقىتقا دەيىن اتقارىلعان جۇمىستار لەگىن باياندادى.
حالىق كوكەيىندە جۇرگەن ماڭىزدى سۇراقتاردىڭ ءبىرى – ورتالىق ساياباقتىڭ قاي ۋاقىتتا قولدانىسقا بەرىلەتىندىگى. ءباسپاسوز ءماسليحاتىندا كوپتىڭ سۇراۋلى سۇراعىنا جاۋاپ بەرىلدى. قالا تۇرعىندارىنىڭ دەمالىس ورنى سانالاتىن ورتالىق ساياباقتاعى جۇمىستار ءالى دە جالعاسادى. ساياباق 2019 جىلدىڭ 10 ساۋىرىنەن قايتا قۇرۋ جۇمىستارىنا جابىلعان ەدى. الايدا، ساراپتاما جۇمىستارى وسى ايدىڭ 20-نان كەيىن شىعىپ، مەردىگەر كومپانيامەن كەلىسىمشارت جاسالالى. مەملەكەتتىك ساتىپ الۋ جۇمىستارى مەرزىمى تولىق اياقتالعاننان كەيىن، مەردىگەر كومپانيا جۇمىسقا كىرىسەدى. وسىلايشا، ورتالىق ساياباق قازان ايىنا دەيىن جاڭا كەلبەتكە يە بولماق. ايتا كەتەيىك، اتالعان جۇمىستى ىسكە اسىرۋعا 1 ملرد. تەڭگە قارجى بولىنگەن.
- ساياباقتى قايتا قۇرۋ شەڭبەرىندە كوگالداندىرۋ، جاياۋ جۇرگىنشىلەر جولدارىن، دەمالۋعا ارنالعان الاڭداردى، سپورتتىق ترەناجەرلەردى، تەننيس كورتتارىن، شاعىن ساۋلەت نىساندارىن (ورىندىقتار، قوقىس جاشىكتەرى، اۋىز سۋ بۇرقاقتارى) بالالاردىڭ ويىن الاڭدارىن، قوعامدىق دارەتحانالاردى سالۋ، ۆەلوسيپەد جولدارىن ۇيىمداستىرۋ، جاياۋ جۇرگىنشىلەر جولىن اۋىستىرۋ جۇمىستارى قاراستىرىلعان. ال، وسى ۋاقىتقا دەيىن ورتالىق ساياباق اۋماعىنداعى اعاشتاردى كەسۋ جانە تروتۋار توسەنىشىن بولشەكتەۋ جۇمىستارى جۇرگىزىلدى، - دەدى. ا. وتەلباەۆ.
سەمەي قالاسىنىڭ اقپاراتتىق ورتالىعى
"ادىرنا" ۇلتتىق پورتالى
