جاقىندا ارىس قالاسىنان كەلگەن بالالارعا ارنالعان «ءبىر شاڭىراق استىندا» فەستيۆالى ءوتتى. اباي اتىنداعى كىتاپحانادا «قاراعايلى» شيپاجايىندا دەمالىپ جاتقان 58 بالاعا تانىمدىق ەكسكۋرسياسى جۇرگىزىلدى. ۇيىمداستىرۋشىلار بالالاردى جاس مولشەرىنە قاراي ەكى توپقا ءبولدى. ەرەسەك توپقا ۇيىمداستىرۋشىلار ارنايى 3 الاڭدى دايىنداعان. بۇل جەردە بالالار ۇستەل تەننيسى الاڭى، سۇحبات الاڭى جانە بالالار ادەبيەتى بولىمىمەن تانىسا الدى. ال، جاسى كىشى توپقا ۋاقىت جىلدامدىعىنا قاراي وقۋ-جاتتىعۋ جۇمىستارى ۇيىمداستىرىلدى. شارا دوستىق ۇيىندە جالعاسىن تاپتى. بالالار وزگە ۇلت وكىلدەرىنىڭ دايىنداعان مەرەكەلىك كونتسەرتىن تاماشالادى.
- ءبىز بىرلىگى مەن ىنتىماعى جاراسقان ەلمىز. قيىن كەزدە كومەك كورسەتۋ بىزدەر ءۇشىن پارىز. بۇل شارادا وزگە ۇلت وكىلدەرى «ارىسپەن بىرگە» ەكەندىكتەرىن كورسەتۋدە. بالالارعا ارنالعان مەرەكەلىك كونتسەرت ۇيىمداستىرىلىپ، تاماشا كوڭىل-كۇي سىيلاۋدا، - دەدى دوستىق ءۇيىنىڭ باسشىسى نادەجدا شاروۆا.
شارا سوڭى، «مەكتەپكە بارار جول» اكتسياسىمەن قورىتىندىلاندى. ارنايى دەمەۋشىلەردىڭ قاراجاتى ەسەبىنەن بالالارعا مەكتەپكە قاجەت قۇرال-جابدىقتار سىيعا تارتىلدى.
ايتا كەتەيىك، شارا سەمەي قالاسىنىڭ دوستىق ءۇيى، ەتنومادەني بىرلەستىكتەر، قوعامدىق كەلىسىم كەڭەسى، انالار كەڭەسى، «جانۇيا ورتالىعى» قوعامدىق قورى مەن اباي اتىنداعى كىتاپحانا قىزمەتكەرلەرىنىڭ ۇيىمداستىرۋىمەن وتكىزىلدى.
"ادىرنا" ۇلتتىق پورتالى
