مەملەكەت باسشىسى قاسىم-جومارت توقاەۆ پرەمەر-ءمينيستردىڭ ورىنباسارى قانات بوزىمباەۆتى قابىلدادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
پرەزيدەنتكە ۇكىمەتتىڭ سۋ تاسقىنى سالدارىن جويۋ جانە زارداپ شەككەن ازاماتتارعا كومەك كورسەتۋ ءۇشىن اتقارىپ جاتقان جۇمىستارى جونىندە مالىمەت بەرىلدى.
پرەمەر-ءمينيستردىڭ ورىنباسارى بۇگىندە 64 مىڭنان استام ادام ءوز ۇيلەرىنە ورالعانىن ايتتى.
ەۆاكۋاتسيالىق پۋنكتتەردە تۇرعىندارعا قاجەتتى كومەك كورسەتىلۋدە. تابيعات اپاتى كەزىندە جالپى 11 998 تۇرعىن ءۇيدى، 5359 ساياجاي قۇرىلىسىن سۋ باسقان.
قانات بوزىمباەۆتىڭ ايتۋىنشا، زارداپ شەككەن وڭىرلەردە 16715 ءۇي تەكسەرۋدەن وتكەن. ونىڭ ىشىندە 15 464 نىساندى باعالاۋ جۇمىستارى اياقتالعان. باعالاۋ ناتيجەسى بويىنشا 9903 ءۇيدى جوندەۋگە بولادى، ال 6875 ءۇي قالپىنا كەلتىرۋگە جارامسىز دەپ تانىلدى. جارامسىز ۇيلەردىڭ ورنىنا نارىقتان 4525 ءۇي مەن پاتەر ساتىپ الۋ، سونداي-اق تيپتىك جوبامەن 2350 ءۇي سالۋ جوسپارلانىپ وتىر.
بۇگىندە نارىقتان 1814 پاتەر مەن ءۇي ساتىپ الۋ ءۇشىن كەلىسىمشارتتار جاسالعان. زارداپ شەككەن ايماقتارداعى 841 وتباسى بۇرىنعى بۇزىلعان ۇيلەرىنىڭ ورنىنا جاڭا باسپاناعا قونىستاندى.
قازىرگى ۋاقىتتا 4521 وتباسى ۇيلەرىن جوندەۋ جانە قالپىنا كەلتىرۋ ماقساتىندا 57,4 ميلليارد تەڭگە كولەمىندە وتەماقى الدى. جالپى، تۇرعىن ۇيلەردى قالپىنا كەلتىرۋگە 237 ميلليارد تەڭگە قاجەت.
سونىمەن قاتار مەملەكەت باسشىسىنا بىررەتتىك تولەمدەردى تولەۋ ءۇشىن ۇكىمەت تاراپىنان قابىلدانىپ جاتقان شارالار جونىندە باياندالدى. 2024 جىلعى 6 ماۋسىمداعى جاعداي بويىنشا 31642 وتباسى 100 اەك مولشەرىندە بىررەتتىك تولەماقى الدى (بارلىعى 32440 وتباسىدان ءوتىنىش ءتۇستى). وعان جۇمسالعان قارجى سوماسى 11 ميلليارد تەڭگەدەن اسادى. بۇل باعىتتاعى جۇمىستار قاراعاندى، پاۆلودار، اقمولا، اباي، ۇلىتاۋ وبلىستارىندا تولىق اياقتالدى. ال اقتوبە، باتىس قازاقستان، سولتۇستىك قازاقستان، قوستاناي، اتىراۋ وبلىستارىندا تولەم بەرۋ جالعاسىپ جاتىر.
بۇلىنگەن دۇنيە-مۇلىككە جۇرگىزىلگەن باعالاۋ ءىسى اياقتالعاننان كەيىن زارداپ شەككەن تۇرعىندارعا ەڭ قاجەتتى زاتتار ساتىپ الۋ ءۇشىن 150 اەك-كە دەيىنگى مولشەردە قوسىمشا وتەماقى تولەنەدى (5489 وتباسى 4 ميلليارد تەڭگە كولەمىندە وتەماقى الدى). زارداپ شەككەن بيزنەسكە كەلتىرىلگەن زالالدى وتەۋ جۇمىستارى باستالدى.
قازىرگى ۋاقىتتا وڭىرلىك كوميسسيالار شاعىن جانە ورتا بيزنەس سۋبەكتىلەرىنىڭ جالپى سوماسى شامامەن 377 ميلليون تەڭگە بولاتىن 34 ءوتىنىمىن قاراپ، ماقۇلدادى.
كەزدەسۋ سوڭىندا مەملەكەت باسشىسى زارداپ شەككەن تۇرعىن ۇيلەردى باعالاۋ، تەحنيكالىق تەكسەرۋ جۇرگىزۋ ءىسىن جەدەلدەتۋدى، سونداي-اق ولاردى سالۋ مەرزىمى مەن قۇرىلىس ساپاسىن باقىلاۋعا الۋدى تاپسىردى.
