Memleket basshysy Qasym-Jomart Toqaev Premer-Mınıstrdiń orynbasary Qanat Bozymbaevty qabyldady, dep habarlaıdy «Adyrna» tilshisi Aqordaǵa silteme jasap.
Prezıdentke Úkimettiń sý tasqyny saldaryn joıý jáne zardap shekken azamattarǵa kómek kórsetý úshin atqaryp jatqan jumystary jóninde málimet berildi.
Premer-Mınıstrdiń orynbasary búginde 64 myńnan astam adam óz úılerine oralǵanyn aıtty.
Evakýaııalyq pýnktterde turǵyndarǵa qajetti kómek kórsetilýde. Tabıǵat apaty kezinde jalpy 11 998 turǵyn úıdi, 5359 saıajaı qurylysyn sý basqan.
Qanat Bozymbaevtyń aıtýynsha, zardap shekken óńirlerde 16715 úı tekserýden ótken. Onyń ishinde 15 464 nysandy baǵalaý jumystary aıaqtalǵan. Baǵalaý nátıjesi boıynsha 9903 úıdi jóndeýge bolady, al 6875 úı qalpyna keltirýge jaramsyz dep tanyldy. Jaramsyz úılerdiń ornyna naryqtan 4525 úı men páter satyp alý, sondaı-aq tıptik jobamen 2350 úı salý josparlanyp otyr.
Búginde naryqtan 1814 páter men úı satyp alý úshin kelisimsharttar jasalǵan. Zardap shekken aımaqtardaǵy 841 otbasy burynǵy buzylǵan úıleriniń ornyna jańa baspanaǵa qonystandy.
Qazirgi ýaqytta 4521 otbasy úılerin jóndeý jáne qalpyna keltirý maqsatynda 57,4 mıllıard teńge kóleminde ótemaqy aldy. Jalpy, turǵyn úılerdi qalpyna keltirýge 237 mıllıard teńge qajet.
Sonymen qatar Memleket basshysyna birrettik tólemderdi tóleý úshin Úkimet tarapynan qabyldanyp jatqan sharalar jóninde baıandaldy. 2024 jylǵy 6 maýsymdaǵy jaǵdaı boıynsha 31642 otbasy 100 AEK mólsherinde birrettik tólemaqy aldy (barlyǵy 32440 otbasydan ótinish tústi). Oǵan jumsalǵan qarjy somasy 11 mıllıard teńgeden asady. Bul baǵyttaǵy jumystar Qaraǵandy, Pavlodar, Aqmola, Abaı, Ulytaý oblystarynda tolyq aıaqtaldy. Al Aqtóbe, Batys Qazaqstan, Soltústik Qazaqstan, Qostanaı, Atyraý oblystarynda tólem berý jalǵasyp jatyr.
Búlingen dúnıe-múlikke júrgizilgen baǵalaý isi aıaqtalǵannan keıin zardap shekken turǵyndarǵa eń qajetti zattar satyp alý úshin 150 AEK-ke deıingi mólsherde qosymsha ótemaqy tólenedi (5489 otbasy 4 mıllıard teńge kóleminde ótemaqy aldy). Zardap shekken bızneske keltirilgen zalaldy óteý jumystary bastaldy.
Qazirgi ýaqytta óńirlik komıssııalar shaǵyn jáne orta bıznes sýbektileriniń jalpy somasy shamamen 377 mıllıon teńge bolatyn 34 ótinimin qarap, maquldady.
Kezdesý sońynda Memleket basshysy zardap shekken turǵyn úılerdi baǵalaý, tehnıkalyq tekserý júrgizý isin jedeldetýdi, sondaı-aq olardy salý merzimi men qurylys sapasyn baqylaýǵa alýdy tapsyrdy.
