الماتى مەتروسىنىڭ قىزمەتكەرلەرى بيۋدجەت قارجىسىن جىمقىردى دەپ كۇدىكتەلىپ وتىر. بۇل تۋرالى 6 ماۋسىمدا باس كولىك پروكۋراتۋراسى ايتتى، دەپ حابارلايدى «ادىرنا» ءتىلشىسى.
«مەتروپوليتەن» كمك قىزمەتكەرلەرى لوكوموتيۆتەرگە ارنالعان باستاپقى رەزەڭكە سەرىپپەلەردى 137 ميلليون تەڭگەگە كوتەرىلگەن باعامەن ساتىپ العان. بۇل تۇجىرىمدى مەتروپوليتەننىڭ اۋديتورلىق ەسەبى دە راستادى، وسىعان بايلانىستى كولىك پروكۋراتۋراسى سوتقا دەيىنگى تەرگەپ-تەكسەرۋدى تىركەدى، ونى قازىرگى ۋاقىتتا الماتى قالاسى بويىنشا سىبايلاس جەمقورلىققا قارسى قىزمەت جۇرگىزىپ جاتىر»،—دەلىنگەن حابارلامادا.
ەسكە سالايىق، بۇعان دەيىن الماتىدا مەترو سالۋ ءۇشىن بولىنگەن قاراجاتتان 5 ملرد تەڭگەدەن استام اقشانىڭ ۇرلانعانىن جازعان ەدىك. قاڭتار ايىندا باس كولىك پروكۋرورى تيمۋر سۇلەيمەنوۆ مەملەكەتكە 53 ملرد تەڭگەدەن استام سوماعا اكتيۆتەر قايتارىلىپ، 1 358 تۇلعانىڭ ءارتۇرلى جاۋاپكەرشىلىككە تارتىلعانىن مالىمدەدى.
