Almaty metrosynyń qyzmetkerleri bıýdjet qarjysyn jymqyrdy dep kúdiktelip otyr. Bul týraly 6 maýsymda Bas kólik prokýratýrasy aıtty, dep habarlaıdy «Adyrna» tilshisi.
«Metropolıten» KMK qyzmetkerleri lokomotıvterge arnalǵan bastapqy rezeńke serippelerdi 137 mıllıon teńgege kóterilgen baǵamen satyp alǵan. Bul tujyrymdy Metropolıtenniń aýdıtorlyq esebi de rastady, osyǵan baılanysty Kólik prokýratýrasy sotqa deıingi tergep-tekserýdi tirkedi, ony qazirgi ýaqytta Almaty qalasy boıynsha Sybaılas jemqorlyqqa qarsy qyzmet júrgizip jatyr»,—delingen habarlamada.
Eske salaıyq, buǵan deıin Almatyda metro salý úshin bólingen qarajattan 5 mlrd teńgeden astam aqshanyń urlanǵanyn jazǵan edik. Qańtar aıynda Bas kólik prokýrory Tımýr Súleımenov memleketke 53 mlrd teńgeden astam somaǵa aktıvter qaıtarylyp, 1 358 tulǵanyń ártúrli jaýapkershilikke tartylǵanyn málimdedi.
