Eks-depýtat, jyrshy Bekbolat Tileýhan Qazaqstanda jer silkinisi men topan sýdyń bolǵanyna táńirshilderdi kinálady. Bul týraly ol Top baige ıýtýb arnasyna bergen suhbatynda aıtty, dep habarlaıdy “Adyrna” ulttyq portaly.
“Qazaqta “kápir toq bolsa, musylman tynysh” degen keremet sóz bar. Tipti, musylmannyń tynyshtyǵy úshin kápirdiń toq bolýyna tilekshi bolady. Endi óıstip otyrǵan qazaqty musylman emes dep jatyr qazir. Musylmanshyldyqtan basyn ala qashyp jatyr.
Ramazan aıynyń kezinde baqsylardyń quryltaıyn jasady. Endi odan keıin topan sý boldy eken dep, jer silkindi eken dep renjimeńiz. Qudaıǵa, Allaǵa til tıgizip jatyr, eskertip jatyr. Nege Ramazan aıynda qara túnek basyp ketti bir sátte? Munyń bári eskertý”, dedi Bekbolat Tileýhan.
Belgili kásipker, qoǵam belsendisi Ahmetbek Nursıla óziniń Facebook paraqshasynda Bekbolat Tileýhannyń bul sózine pikir bildirip, saýal joldady.
«Bekbolat baýyryma birer suraq:
1. Qudaı qazaqqa ósh pe? Nege , Shveııa, Norvegııa, Fınlıandııa, Malta ı Barbados elderinde eshqashan jerdi silkimeıdi, al Qazaqstandaǵy jerdi silkileıdi?
2. Qudaı nege Almatyǵa óshigip alǵan? Nege Soltústik oblystarda jerdi silkimeıdi? Eger Táńirshilder óz quryltaıyn Astanada ne Kókshetaýda jasasa ne bolar edi? Sol jerdi silkileı me, joq báribir sol Almatyǵa kárin tóge bere me?
Jalpy Bekbolat kózi ashyq, kóp oqyǵan adamsyń ǵoı, jerdiń silkinisi jaıly ǵylym ne deıdi eken? Ǵylymdy oqyǵan adamdardyń jazǵanyn bir sholyp shyqsań. Dinde de "oqy, oqy jáne oqy" degen ǵoı. Tek qurandy ǵana oqı bermeı geografııa, seısmologııa degen ǵylymǵa da biraýyq ýaqyt bólip, sodan keıin pikirińdi taǵy bir jazyp shyqsań”, dep jazdy Ahmetbek Nursıla.
Bul jazbanyń astyna avtordy qoldaǵan birneshe pikirler jazyldy.
”Kerek deseń, biz jaqta quran órtep jatyr, al Aýǵanstanda dinge til tıgizseń darǵa asady. Nege, Qudaı Aýǵanstanda jer silkileıdi, al Danııada silkilemeıdi”, dep jazýda pikir bildirýshiler.
