بۇگىن اۋدان ورتالىعىنداعى «دوستىق» ساياباعىندا مەملەكەتتىك تۋدى كوتەرۋ ءراسىمى ءوتتى. سالتاناتتى شاراعا اۋدان اكىمى اسلانبەك سارقۇلوۆ قاتىستى. اۋدان اكىمى اۋدان حالقىن ايتۋلى مەرەكەمەن قۇتتىقتاپ، جىلى لەبىزىن ءبىلدىردى.
— مەملەكەتتىك رامىزدەر — ەلىمىزدىڭ كەشەگىسى مەن بۇگىنىن ساباقتاستىرىپ، ەرتەڭىنە جول باستار قۇدىرەتتى كۇش. ءار وتانداسىمىز حالقىمىزدىڭ ارمانىن اسقاقتاتقان تۋىمىزدى جەرگە جىقپاي، ەل تاريحىنىڭ ەرتەڭىنە تامىر تارتقان ەلتاڭبانى قادىرلەپ، بىرلىك پەن تاتۋلىققا ۇندەگەن ءانۇراندى جاتقا ءبىلىپ، قۇرمەتتەۋى قاجەت. مەرەيلى مەرەكەدە بارشاڭىزعا زور دەنساۋلىق، وتباسىلارىڭىزعا اماندىق، ەڭبەكتەرىڭىزگە تولايىم تابىستار تىلەيمىن. تاۋەلسىزدىگىمىزدىڭ سيمۆولى سانالاتىن مەملەكەتتىك رامىزدەرىمىزدىڭ مارتەبەسى ارتا بەرسىن!، — دەدى اۋدان اكىمى.
سالتاناتتى شارادا بولاشاق اۋىلدىق وكرۋگى اكىمىنىڭ اپپاراتى، كازتالوۆ اۋدانىنىڭ سوتى، اۋداندىق ورتالىقتاندىرىلعان كىتاپحانا، اۋداندىق جاستارمەن جۇمىس جونىندەگى رەسۋرستىق ورتالىعى،«بوكەيوردا» مەملەكەتتىك تابيعي رەزەرۆاتىنىڭ ۇجىمى مەملەكەتتىك رامىزدەردى قۇرمەتتەپ، كۇتىپ ۇستاپ، ناسيحاتتاۋ جۇمىستارىن بەلسەندى جۇرگىزگەنى ءۇشىن اۋدان اكىمىنىڭ العىس حاتىمەن ماراپاتتالدى. ال جالپاقتال اۋىلدىق وكرۋگى اكىمى اپپاراتىنىڭ باس مامانى رۋسلان مۋسين مەملەكەتتىك قىزمەتشىلەردىڭ انتىن قابىلدادى.
ءىس-شارادا اۋداندىق ءماسليحات دەپۋتاتى سەرىكبول قادەموۆ، بوستاندىق اۋىلدىق وكرۋگىنە تۋ تۇعىرىن ورناتقان تۇلەكتەر اتىنان اسەت حيسەميدەنوۆ ءسوز الىپ، اۋدان جۇرتشىلىعىن مەرەكەمەن قۇتتىقتادى.
قازاقستان رەسپۋبليكاسىنىڭ مەملەكەتتىك تۋىن بەيبىت كۇننىڭ باتىرى، №11 ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى، ازاماتتىق قورعاۋ كىشى سەرجانتى مەرجان جانعاليەۆ جانە سۋ تاسقىنى كەزىندە ايانباي ەڭبەك ەتكەن كازتالوۆ اۋدانىنىڭ توتەنشە جاعدايلار ءبولىمىنىڭ باس مامانى، ازاماتتىق قورعاۋ كاپيتانى اينار ساكەنوۆ كوتەردى.
ايتۋلى مەرەكەگە وراي اۋدان ورتالىعىندا اۆتو جانە ۆەلوشەرۋ ۇيىمداستىرىلدى.
كازتالوۆ اۋدانى اكىمدىگىنىڭ ءباسپاسوز قىزمەتى
