Búgin aýdan ortalyǵyndaǵy «Dostyq» saıabaǵynda memlekettik týdy kóterý rásimi ótti. Saltanatty sharaǵa aýdan ákimi Aslanbek Sarqulov qatysty. Aýdan ákimi aýdan halqyn aıtýly merekemen quttyqtap, jyly lebizin bildirdi.
— Memlekettik rámizder — elimizdiń keshegisi men búginin sabaqtastyryp, erteńine jol bastar qudiretti kúsh. Ár otandasymyz halqymyzdyń armanyn asqaqtatqan Týymyzdy jerge jyqpaı, el tarıhynyń erteńine tamyr tartqan Eltańbany qadirlep, birlik pen tatýlyqqa úndegen Ánurandy jatqa bilip, qurmetteýi qajet. Mereıli merekede barshańyzǵa zor densaýlyq, otbasylaryńyzǵa amandyq, eńbekterińizge tolaıym tabystar tileımin. Táýelsizdigimizdiń sımvoly sanalatyn memlekettik rámizderimizdiń mártebesi arta bersin!, — dedi aýdan ákimi.
Saltanatty sharada Bolashaq aýyldyq okrýgi ákiminiń apparaty, Kaztalov aýdanynyń soty, aýdandyq ortalyqtandyrylǵan kitaphana, aýdandyq jastarmen jumys jónindegi resýrstyq ortalyǵy,«Bókeıorda» memlekettik tabıǵı rezervatynyń ujymy Memlekettik rámizderdi qurmettep, kútip ustap, nasıhattaý jumystaryn belsendi júrgizgeni úshin aýdan ákiminiń alǵys hatymen marapattaldy. Al Jalpaqtal aýyldyq okrýgi ákimi apparatynyń bas mamany Rýslan Mýsın memlekettik qyzmetshilerdiń antyn qabyldady.
Is-sharada aýdandyq máslıhat depýtaty Serikbol Qademov, Bostandyq aýyldyq okrýgine tý tuǵyryn ornatqan túlekter atynan Áset Hısemıdenov sóz alyp, aýdan jurtshylyǵyn merekemen quttyqtady.
Qazaqstan Respýblıkasynyń Memlekettik týyn beıbit kúnniń batyry, №11 órt sóndirý bóliminiń órt sóndirýshi-qutqarýshysy, azamattyq qorǵaý kishi serjanty Merjan Janǵalıev jáne sý tasqyny kezinde aıanbaı eńbek etken Kaztalov aýdanynyń tótenshe jaǵdaılar bóliminiń bas mamany, azamattyq qorǵaý kapıtany Aınar Sákenov kóterdi.
Aıtýly merekege oraı aýdan ortalyǵynda avto jáne velosherý uıymdastyryldy.
Kaztalov aýdany ákimdiginiń baspasóz qyzmeti
