مەملەكەتتىك كەڭەسشى ەرلان قارين «بىرلىك پەن دامۋ: مەملەكەت باسشىسى قاسىم-جومارت توقاەۆتىڭ ساياسي باعدارىنىڭ باستى نەگىزدەرى»، اتتى ماقالاسىندا پرەزيدەنتتىڭ سىندارلى ساياساتىنداعى ءمان مەن ماعىنانى اشىپ، تاعىلىمى مەن تۋىنداۋ تاريحىن ءتۇسىندىردى، دەپ حابارلايدى "ادىرنا" ۇلتتىق پورتالى.
ماقالا «ەگەمەن قازاقستان» گازەتىندە جاريالاندى. ماتەريالدا ادىلەتتى قازاقستان، جاڭا يدەولوگيا، جاڭاشا وزگەرىستەر، قوعامدىق ەتيكا، پىكىرتالاس، بيلىك پەن حالىقتىڭ ديالوگى، مەملەكەتتىك اپپاراتتاعى تىڭ جۇيە، جاسامپازدىق جولى سىندى تاقىرىپتار قامتىلعان سەگىز بولىمشەدەن تۇرادى.
مەملەكەتتىك كەڭەسشى "ادىلەتتى قازاقستان" ۇعىمىنىڭ ءمانىن ءتۇسىندىردى:
"شىن مانىندە، ادىلەتتى قازاقستان – بازبىرەۋلەر ايتىپ جۇرگەندەي، بيلىكتىڭ ويلاپ تاپقان جاساندى يدەياسى ەمەس، پرەزيدەنتتىڭ ستراتەگيالىق باعدارىنىڭ يدەيالىق نەگىزى. قاسىم-جومارت توقاەۆ ءوزىنىڭ ەڭ نەگىزگى ميسسياسى – ادىلەتتى قازاقستاندى قۇرۋ ەكەنىن ۇنەمى ايتىپ ءجۇر. ساياسي، ەكونوميكالىق جانە الەۋمەتتىك-مادەني سالالاردا جۇرگىزىلىپ جاتقان جۇيەلى رەفورمالاردىڭ ءبارى، ەڭ الدىمەن، وسى ستراتەگيالىق ماقساتقا قول جەتكىزۋگە ارنالعان. پرەزيدەنتتىڭ ەلىمىزدى تۇبەگەيلى جانە جان-جاقتى جاڭعىرتۋعا قاتىستى بايىپتاماسىنىڭ تۇپكى ءمانى وسىندا جاتىر" دەلىندى ماقالادا.
سونىمەن قاتار، ول «ءارتۇرلى پىكىر – ءبىرتۇتاس ۇلت»، «حالىق ۇنىنە قۇلاق اساتىن مەملەكەت»، «زاڭ جانە ءتارتىپ»، «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت»، «ادال ازامات» اتتى بەس تۇجىرىمدى ءتۇسىندىردى.
"بىرەگەيلىگىمىزدى جانە وزىندىك ءومىر سالتىمىزدى ساقتاۋ – ىشكى ساياساتىمىزدىڭ كۇن تارتىبىندە تۇرعان باستى مىندەت. بۇل – ءبىزدى باسقا ەلدەردەن، باسقا حالىقتار مەن باسقا مادەنيەتتەردەن ەرەكشەلەپ تۇراتىن قۇندىلىقتار، ياعني جۇرتىمىزدىڭ تامىرى تەرەڭ شەجىرەسى، كوپ ۇلتتى، كوپ ءتىلدى سيپاتى، ءدىني تولەرانتتىلىعى جانە مادەنيەتىمىزدىڭ ءار الۋاندىعى، ءبىر-بىرىمىزبەن ءتىل تابىسا ءبىلۋىمىز، ءوزارا قولداۋ كورسەتۋىمىز جانە ىرىستى ىنتىماعىمىز. وسىنىڭ ءبارى تۇتاسا كەلگەندە، قازاقستاننىڭ ءومىر سالتىن تانىتادى. ءبىر سوزبەن ايتساق، ءبىز وزىق ويلى ۇلت رەتىندە ءاردايىم ستراتەگيالىق باعدارىمىزدى بەرىك ۇستانىپ، ۇلتتىق مۇددەمىز بەن ءومىر سالتىمىزدى دايەكتى ءارى تاباندى تۇردە قورعاۋىمىز كەرەك" دەپ جازدى ەرلان قارين.
مەملەكەت باسشىسى ەنگىزگەن وزگەرىستەردىڭ ۇتىمدىلىعى مەن ونىڭ استارىنداعى ءداستۇر مەن سالت نەگىزىنىڭ استاسىپ جاتۋىن سارالاپ جەتكىزگەن ەرلان قارين ءوز ماقالاسىندا ەلدىڭ ىشكى جانە سىرتقى ساياساتىنداعى ماڭىزدى دۇنيەلەردى اتاپ كورسەتتى:
"قازاقستان ىشكى جانە سىرتقى ساياساتىن بىرەۋگە ۇناۋ ءۇشىن نەمەسە قانداي دا ءبىر ۇردىسكە ىلەسۋ ءۇشىن جۇرگىزبەيدى. ءبىز، ەڭ اۋەلى، ۇلت مۇددەسىن، ءتول ۇستانىمدارىمىزدى باسشىلىققا الامىز. جاھاندىق ساياساتتا كوڭىلشەكتىك پەن اڭعالدىققا جول بەرۋگە استە بولمايدى. كوپ ۆەكتورلى نەمەسە بەيتاراپ ساياسات جۇرگىزۋ وڭاي ءارى ىڭعايلى دەگەن پىكىر بار. بۇل شىندىققا جاناسپايتىن ديلەتانتتىق تۇجىرىم دەۋگە بولادى. قازاقستان كوپ ۆەكتورلى، ساليقالى ساياسات جۇرگىزىپ وتىر. مۇنداي ساياسات ۇستانۋ، اسىرەسە جەر ءجۇزى سان تاراپقا بولىنگەن قازىرگى كەزەڭدە وتە قيىن جانە وراسان زور كۇش-جىگەردى تالاپ ەدى" دەلىنگەن مەملەكەتتىك كەڭەسشى ماقالاسىندا.
