Memlekettik keńesshi Erlan Qarın «Birlik pen damý: Memleket basshysy Qasym-Jomart Toqaevtyń saıası baǵdarynyń basty negizderi», atty maqalasynda prezıdenttiń syndarly saıasatyndaǵy mán men maǵynany ashyp, taǵylymy men týyndaý tarıhyn túsindirdi, dep habarlaıdy "Adyrna" ulttyq portaly.
Maqala «Egemen Qazaqstan» gazetinde jarııalandy. Materıalda ádiletti Qazaqstan, jańa ıdeologııa, jańasha ózgerister, qoǵamdyq etıka, pikirtalas, bılik pen halyqtyń dıalogy, memlekettik apparattaǵy tyń júıe, jasampazdyq joly syndy taqyryptar qamtylǵan segiz bólimsheden turady.
Memlekettik keńesshi "Ádiletti Qazaqstan" uǵymynyń mánin túsindirdi:
"Shyn máninde, Ádiletti Qazaqstan – bázbireýler aıtyp júrgendeı, bıliktiń oılap tapqan jasandy ıdeıasy emes, Prezıdenttiń strategııalyq baǵdarynyń ıdeıalyq negizi. Qasym-Jomart Toqaev óziniń eń negizgi mıssııasy – Ádiletti Qazaqstandy qurý ekenin únemi aıtyp júr. Saıası, ekonomıkalyq jáne áleýmettik-mádenı salalarda júrgizilip jatqan júıeli reformalardyń bári, eń aldymen, osy strategııalyq maqsatqa qol jetkizýge arnalǵan. Prezıdenttiń elimizdi túbegeıli jáne jan-jaqty jańǵyrtýǵa qatysty baıyptamasynyń túpki máni osynda jatyr" delindi maqalada.
Sonymen qatar, ol «Ártúrli pikir – birtutas ult», «Halyq únine qulaq asatyn memleket», «Zań jáne tártip», «Kúshti Prezıdent – yqpaldy Parlament – esep beretin Úkimet», «Adal azamat» atty bes tujyrymdy túsindirdi.
"Biregeıligimizdi jáne ózindik ómir saltymyzdy saqtaý – ishki saıasatymyzdyń kún tártibinde turǵan basty mindet. Bul – bizdi basqa elderden, basqa halyqtar men basqa mádenıetterden erekshelep turatyn qundylyqtar, ıaǵnı jurtymyzdyń tamyry tereń shejiresi, kóp ultty, kóp tildi sıpaty, dinı toleranttylyǵy jáne mádenıetimizdiń ár alýandyǵy, bir-birimizben til tabysa bilýimiz, ózara qoldaý kórsetýimiz jáne yrysty yntymaǵymyz. Osynyń bári tutasa kelgende, Qazaqstannyń ómir saltyn tanytady. Bir sózben aıtsaq, biz ozyq oıly ult retinde árdaıym strategııalyq baǵdarymyzdy berik ustanyp, ulttyq múddemiz ben ómir saltymyzdy dáıekti ári tabandy túrde qorǵaýymyz kerek" dep jazdy Erlan Qarın.
Memleket basshysy engizgen ózgeristerdiń utymdylyǵy men onyń astaryndaǵy dástúr men salt negiziniń astasyp jatýyn saralap jetkizgen Erlan Qarın óz maqalasynda eldiń ishki jáne syrtqy saıasatyndaǵy mańyzdy dúnıelerdi atap kórsetti:
"Qazaqstan ishki jáne syrtqy saıasatyn bireýge unaý úshin nemese qandaı da bir úrdiske ilesý úshin júrgizbeıdi. Biz, eń áýeli, ult múddesin, tól ustanymdarymyzdy basshylyqqa alamyz. Jahandyq saıasatta kóńilshektik pen ańǵaldyqqa jol berýge áste bolmaıdy. Kóp vektorly nemese beıtarap saıasat júrgizý ońaı ári yńǵaıly degen pikir bar. Bul shyndyqqa janaspaıtyn dıletanttyq tujyrym deýge bolady. Qazaqstan kóp vektorly, salıqaly saıasat júrgizip otyr. Mundaı saıasat ustaný, ásirese jer júzi san tarapqa bólingen qazirgi kezeńde óte qıyn jáne orasan zor kúsh-jigerdi talap edi" delingen Memlekettik keńesshi maqalasynda.
