حالىقارالىق بالالاردى قورعاۋ كۇنىندە «جاس داۋرەن» لاگەرى العاشقى جازعى اۋىسىمدى قابىلدادى. العاشقىلىلار بولىپ شورتاندى اۋدانىنان جۇزگە جۋىق بالا دەمالىسىن وبلىستىڭ قالا سىرتىنداعى لاگەرىندە باستادى.
«بالالارعا وسى كۇندەرى كوڭىلدى ەستافەتالار، سۋرەت ۇيىرمەسىندە، اعاش وڭدەۋ شەبەرحاناسىنداعى جۇمىستار، بي كەشى، كەشكى كينوتەاتر، كوڭىلدىلەر كلۋبى ۇيىمداستىرىلدى. ستاديوندا وترياد اراسىندا فۋتبول، ۆولەيبول جارىسى دا وتكىزىلەدى. دەمالۋشى بالالار 5 مەزگىل تاماقتانادى»،-دەيدى لاگەر باسشىلىعى.
وسى جازدا قالا سىرتىنداعى دەمالىس 15 ماۋسىمدىق بالالار ساۋىقتىرۋ ورتالىعى مەن 2 جىل بويى جۇمىس ىستەيتىن لاگەرلەرىندە وتكىزىلەدى. وبلىس اۋماعىندا ۇزبەي جىل بويى ساندىقتاۋ اۋدانىنداعى «جاس داۋرەن» لاگەرى جانە بۋراباي اۋدانىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعى جۇمىس جۇرگىزۋدە. 15 ماۋسىمدىق لاگەردىڭ 7-ءى مەملەكەتتىك جانە 8 جەكە ۇيىم. مەملەكەتتىك لاگەرلەر سولتۇستىك قازاقستان وبلىسىنىڭ اقكول، زەرەندى، بۋراباي، ەرەيمەنتاۋ، ساندىقتاۋ اۋداندارىندا جانە ايىرتاۋ اۋدانىندا جۇمىس جۇرگىزەتىن بولادى. جەكە لاگەرلەر بۋراباي، زەرەندى، تسەلينوگراد جانە ءبىرجان سال اۋدانىندا ورنالاسقان.
جاز بويى بارلىعى بالالار 7-10 كۇنگە سوزىلاتىن 6-7 اۋىسىمدا دەمالادى.
«جاز بويى قالا سىرتىنداعى لاگەرلەردە 14 500-گە جۋىق اقمولالىق وقۋشىنى قامتۋ جوسپارلانعان. ولاردىڭ ءبىر جارىمنان استامى تەگىن دەمالادى. حالىقتىڭ الەۋمەتتىك وسال توپتارىنان شىققان بالالار ءۇشىن «جالپىعا بىردەي ءبىلىم بەرۋ» قورىنان جولداما ساتىپ الۋعا 121,5 ملن. تەڭگە قاراستىرىلعان»، - دەپ ءبولىستى وبلىستىق باسقارما باسشىسى شوقان ورازالين.
سونىمەن قاتار، جازعى كەزەڭدە وبلىستىڭ 265 وقۋشىسى «بالداۋرەن» رەسپۋبليكالىق ورتالىعىنىڭ فيليالدارىنا بارادى. 5 ماۋسىمنان باستاپ الەۋمەتتىك وسال توپتاردىڭ 150 بالاسى «زۆەزدنىي» بسو بازاسىندا ساۋىقتىرىلادى.
قازىرگى ۋاقىتتا قر ءبىلىم مينيسترلىگىمەن بىرلەسىپ «قازاقستان حالقىنا» قورىنىڭ قاراجاتىنان اۋىل مەكتەپتەرىنىڭ 5-8 سىنىپتارىنىڭ 1005 وقۋشىسىنا تەگىن دەمالىس ۇيىمداستىرۋ تۋرالى ماسەلە پىسىقتالدى. ولار شىعارماشىلىق، ينتەللەكتۋالدى، سپورتتىق جارىستار مەن فەستيۆالدەردىڭ جەڭىمپازدارى.
سونىمەن قاتار، 34 مىڭنان استام بالانىڭ قاتىسۋىمەن تاماقتاناتىن 198 مەكتەپ جانىنداعى الاڭ جانە 56 مىڭعا جۋىق وقۋشى دەمالاتىن تاماقسىز 290 مەكتەپ جانىنداعى الاڭ جۇمىسى ۇيىمداستىرىلۋدا.
تاۋەكەل توبىنداعى بالالار دا، حالىقتىڭ الەۋمەتتىك قورعالماعان توپتارىنداعى بالالار دا نازاردان تىس قالمايدى. 7000 بالانىڭ قاتىسۋىمەن بالالاردىڭ جازعى دەمالىسىنىڭ 47-گە جۋىق از شىعىندى نىساندارى جۇمىلدىرىلادى. بۇل ولكەتانۋ جورىقتارى، ەكسكۋرسيالار،شاتىرلار، كيىز ۇيلەر.
بارلىق دەمالىس تۇرلەرىمەن 120 500 اقمولالىق بالا قامتىلاتىن بولادى.
