يران پرەزيدەنتتىگىنە العاشقى ايەل ۇمىتكەر رەتىندە تىركەلدى. بۇل تۋرالى 1 ماۋسىم كۇنى Mehr اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سۇيەنسەك، يراننىڭ بۇرىنعى دەپۋتاتى، عالىم زوحرە ەلاحيان پرەزيدەنت يبراحيم رايسي ۇشاق اپاتىنان قايتىس بولعاننان كەيىن بەلگىلەنگەن كەزەكتەن تىس پرەزيدەنت سايلاۋىنا ۇمىتكەر رەتىندە تىركەلگەن العاشقى ايەل بولدى.
“يسلام يران اسپانىنان ءۇمىت نۇرى كورىندى. ءوز ەلىمنىڭ ايەلدەر قوعامىنىڭ وكىلى رەتىندە سايلاۋ كەڭسەسىنە قۇجاتتاردى تاپسىردىم»، — دەپ جازدى ەلاحيان ءوزىنىڭ X پاراقشاسىندا.
Mehr اگەنتتىگى مالامدەگەندەي، ءۇش كۇندە پرەزيدەنت سايلاۋىنا قاتىسۋعا 17 ادام ءوتىنىش بىلدىرگەن.
ولاردىڭ اراسىندا پارلامەنتتىڭ بۇرىنعى باسشىسى ءالي لاريدجاني، ورتالىق بانكتىڭ بۇرىنعى باسشىسى ابدۋل ناسىر حەمماتي، يسلام رەۆوليۋتسياسى ساقشىلار كورپۋسىنىڭ بۇرىنعى قولباسشىسى گەنەرال ۆاحيد حاگگانيان، تەگەران مەرى اليرەزا زاكاني جانە يراننىڭ رۋحاني جەتەكشىسى اياتوللانىڭ ۇلتتىق قاۋىپسىزدىك جوعارى كەڭەسىندەگى وكىلى سايد دجاليلي بار.
يران پارلامەنتىنىڭ قازىرگى التى مۇشەسى جانە بۇرىنعى بەس مۇشەسى دە سايلاۋعا تۇسكىسى كەلەتىنىن بىلدىرگەن.
ۇمىتكەرلەردى تىركەۋ 30 مامىردا باستالىپ، 3 ماۋسىمعا دەيىن جالعاسادى.
4 ماۋسىمنان باستاپ كونستيتۋتسيانى ساقتاۋشىلار كەڭەسى كانديداتتاردى ءبىر اپتا بويى قاراپ، كانديداتتىڭ ەل پرەزيدەنتى لاۋازىمىنا ساي كەلەتىن-كەلمەيتىنىن انىقتايدى.
سوڭعى ءتىزىم 11 ماۋسىمدا جاريالانادى.
سايلاۋ ناۋقانى ەكى اپتاعا — 12 ماۋسىمنان 26 ماۋسىمعا دەيىن جالعاسادى.
سايلاۋعا ءبىر كۇن قالعاندا «ۇنسىزدىك كۇنى» جاريالانادى، بۇل ۋاقىتتا ۇگىت-ناسيحات جۇمىسىن جۇرگىزۋگە تىيىم سالىنادى.
پرەزيدەنت سايلاۋى 28 ماۋسىمدا وتەدى. ەكىنشى تۋر قاجەت بولعان جاعدايدا 5 شىلدەگە بەلگىلەنەدى.
31 مامىردا يراننىڭ سايلاۋالدى شتابىنىڭ وكىلى موحسين يسلامي ءۇش ايەلدىڭ «شارتقا ساي كەلمەگەنى ءۇشىن» تىركەلمەگەنىن حابارلاعان.
ەسكە سالايىق، يران پرەزيدەنتىنى ۇشاق اپاتىنان قازا تاپتى.
