شۆەيتساريا ۇكىمەتى سەگىز ادامنان عانا تۇرادى ەكەن. بۇل سەگىز ادامنىڭ بىرەۋى كونستيتۋتسيا بويىنشا جىل سايىن اۋىسىپ ءبىر جىلدان ەلگە پرەزيدەنت بولسا، ەكىنشىسى ۆيتسە پرەزيدەنت بولىپ تاعايىندالادى ەكەن جانە وسى سەگىز ادام كەزەكتەسىپ ەلگە باسشى بوپ، ءبارى ءبىر - ءبىر مينيسترلىكتىڭ قۇلاعىن ۇستاپ مينيستىرلەردىڭ قىزمەتىن اتقارىپ وتىرادى ەكەن. پرەزيدەنتى دە ءبىر سالا مينيستىرلىكتىڭ جۇمىسىن ءوز موينىنا الاتىن كورىنەدى. وسى شۆەيتساريا ۇكىمەتىن جۇرت الەمدەگى وتە دەموكراتيالىق، شاعىن جانەحالىققا ءتيىمدى ۇكىمەت دەپ سانايدى - مىس...
ال ءبىزدىڭ "يا پورۋچايۋ پراۆيتەلستۆۋ" لەردىڭ ءوزى باس بولىپ ءبىر مينيستىرلىكتىڭ قىزمەتىن اتقارۋىن ەلەستەتۋ ءتىپتى مۇمكىن ەمەس اۋ... ولارعا ونداي "مەلوچتارمەن" باس قاتىرۋدىڭ نە قاجەتى بار ...بىزدە ولار وندايعا كەلمەيتىن تىم "ۇلى تۇلعا" بوپ كەلەدى.
شۆەيتساريا پارلامەنتى دە الەمدەگى كوپ شىعىن تالاپ ەتپەيتىن ەڭ ارزان پارلامەنت سانالادى ەكەن.
شۆەيتساريا پارلامەنت دەپۋتاتتارى، دارىگەر بولسىن، ادۆوكات بولسىن، ينجەنەر بولسىن جىل ون ەكى اي وزدەرىنىڭ نەگىزگى جۇمىستارىن ىستەپ جۇرە بەرەدى ەكەن. (ينجەنەر جوباسىن سىزىپ، دارىگەر ادام ەمدەپ، زاڭگەر زاڭىن قورعاپ دەگەندەي..)
وسى قوس پالاتاداعى 248 دەپۋتات تەك جىلىنا ءتورت رەت باس قوسىپ، 15 كۇننەن ءماجىلىس ۇيىمداستىرىپ، حالىقتىڭ قوردالانىپ قالعان ماسەلەلەرىن جان - جاقتى تالقىلاپ، زاڭ قابىلداپ، وسى ون بەس كۇندە بورشا - بورشا بوپ ءايداااي قاراتەرگە تۇسەدى ەكەن. سونداعى ولاردىڭ الاتىن دەپۋتاتتىق جالاقىلارى اي سايىن 5 جارىم مىڭ ەۆرو نەمەسە جىلىنا 60 مىڭ ەۆرو.
ال شۆەيتساريا ەلىندە حالىقتىڭ ورتاشا جالاقىسى 5 مىڭ ەۆرو بولادى. سوندا بۇل جاقتاعى دەپۋتاتىڭىز قاراپايىم شۆەيتسار مۇعالىمىنەن بەس ءجۇز ەۆرو ارتىق اقشا عانا الادى ەكەن.
بۇل كورسەتكىش بويىنشا رەسەيدەگى دۋما دەپۋتاتتارى قاراپايىم ورىس مۇعالىمىنەن 10 - 15 ەسە ارتىق جالاقى الاتىن بوپ شىقتى. وكىنىشكە وراي ءبىز دە وسىنداي جابايىلىقتىڭ قاتارىندامىز.
جانە وسى جەردە ەڭ كۇيىنەرلىگى سول - ءوز حالقىنىڭ ورتاشا جالاقىسىنان 10 ەسە ارتىق جالاقى الىپ وتىرعان پارلامەنت دەپۋتاتتارىنىڭ تىكەلەي مىندەتىن اتقارۋى ءۇشىن جاناما تۇردە "جەر كوميسسياسى", "ۇلتتىق كەڭەس" دەيتىن ۇيىم - سۇيىمداردىڭ قۇرىلاتىنىن ايتساڭىزشى شىركىن. "مالايعا دا مالاي كەرەك" دەگەن وسى شىعار...
بۇل شۆەيتساريا سوناۋ گيتلەردىڭ زامانىنان بەرى مۇرتى بۇزىلماعان ەۋروپالىق داۋلەتتى دە سونداي ەرەكشە، تىم ءتاۋىر ەل ەدى، قازىر دە سونداي ۇزدىك ەلدەردىڭ قاتارىندا.
قايران ەۋروپا، سەنەن ۇيرەنەرىمىز كوپ اۋ...
ولجاس ءابىل
"ادىرنا" ۇلتتىق پورتالى
