قوس بالاسىن اكىمدىككە تاستاپ كەتكەن انا ءوز ارەكەتىن ءتۇسىندىردى

6272

شىمكەنت قالاسىنىڭ اباي اۋدانىنداعى اكىمدىكتە بالالارىن قالدىرىپ كەتكەن ايەل نە ءۇشىن مۇنداي ارەكەتكە بارعانىن ءتۇسىندىرىپ بەردى. ءتورت بالانىڭ 40 جاستاعى اناسىمەن Tengrinews.kz ءتىلشىسى سويلەسىپ قايتتى. 

گاۋھار ۇسىباليەۆا بالالارمەن شاعىن عانا پاتەردە تۇرادى.  "مۇندا تۇرىپ جاتقانىمىزعا ءبىر اي بولدى. بۇعان دەيىن پاتەردەن-پاتەرگە كوشىپ جۇردىك. سوڭعى جالداپ تۇرعان ءۇيىمىزدىڭ ءىشى كوگەرىپ كەتكەن، وتە ىلعال بولدى. وسى باسپانانى الىپ، اراسىندا ءدارى-دارمەك، نان سەكىلدى كەرەك زاتتاردى بەرىپ تۇرادى. بۇل پاتەرگە ايىنا 30 مىڭ تولەيمىن. 90 مىڭ تەڭگە جاردەماقى بەردى. ونىڭ 30 مىڭىن پاتەرگە، قالعان 60 مىڭىنا مەكتەپكە دايىندالىپ، كيىم-كەشەك، ازىق-تۇلىك الۋ كەرەك. ەڭ قيىنى بالالاردىڭ اۋىرعان كەزدەرى. ءدارى-دارمەككە اقشا بولماي قالادى", - دەيدى گاۋھار ۇسىباليەۆا.

گاۋھار ءبىر جىل بۇرىن كۇيەۋىمەن اجىراسقان. ونىڭ ايتۋىنشا، اجىراسۋدىڭ سەبەبى - جارىنىڭ ۇنەمى ونى كەمسىتىپ، قورلاۋى. بالالارعا دا قول جۇمساعان كەزدەرى بولعان. بۇرىنعى كۇيەۋى ەكىنشى توپتاعى مۇگەدەك ەكەن. گاۋھار قازىر ءبىر جاسار بالاسىنا قاراپ وتىرعاندىقتان جۇمىسقا شىعا المايدى. مۇنداي ومىردەن شارشاعان ول اكىمشىلىكتەن كومەك سۇراعانىن ايتادى.  "اكىمدىككە باردىم. بالالارىمدى قالاي اسىرايمىن دەپ سۇرادىم. ولار ماعان "مۇمكىن سىزدە اقشا بار شىعار، تەكسەرىپ كورەيىك" دەدى. مەن كوڭىلىم بوساپ، نە ءۇشىن ولاي ىستەپ جاتقاندارىن سۇرادىم.

ولار "سەن جاقسىلىقتى تۇسىنبەيدى ەكەنسىڭ، كەت" دەدى. مەن جىلاپ جىبەردىم. مەن ءبىر بالامدى ۇيدە، ەكەۋىن اكىمدىككە قالدىرىپ، ءوزىم ءبىر بالاممەن اۋرۋحاناعا كەتتىم. ماعان سيستەما قويدى. سوسىن اكىمدىككە بارسام بالالارىم وتىر ەكەن، ونىمەن قوسا پوليتسيانى دا شاقىرعان ەكەن", - دەيدى گاۋھار.  پوليتسياعا بارلىق ءمان-جايدى تۇسىندىرۋگە تۋرا كەلدى دەيدى.

گاۋھاردىڭ ايتۋىنشا، اباي اۋدانى اكىمىنىڭ ورىنباسارى كومەك رەتىندە ازىق-تۇلىك، 15 مىڭ تەڭگە جانە ولاردى ۇيگە جەتكىزىپ تاستايتىن كولىك ۇسىنعان. الايدا گاۋھار مۇنداي ءبىر رەتتىك كومەكتەن باس تارتقان.  "ماعان ءبارى ايعايلاي باستادى. 15 تەڭگە مەن ازىق-تۇلىكتى الىپ كەت دەدى. ودان دا وتىرا بەرگەنىم جاقسى دەدىم. ماعان كومەك كەرەك. الاتىن 90 مىڭ تەڭگە ماعان جەتپەيدى. پاتەردىڭ وزىنە 30 مىڭ بەرەمىن. بالالارعا كيىم-كەشەك، ازىق-تۇلىك پەن دارىلەر الۋىم كەرەك. تابىس كوزى مۇلدەم جوق", - دەيدى گاۋھار.  بۇعان دەيىن شىمكەنت قالاسىنىڭ اباي اۋدانىندا جالعىزباستى انا بالالارىن اكىمدىكتە قالدىرىپ كەتكەنىن ايتقان بولاتىنبىز. اكىمدىكتەگىلەردىڭ ايتۋى بويىنشا، مەملەكەتتىك اتاۋلى كومەكتى مەرزىمىنەن بۇرىن بەرۋدى سۇراعان. اۋدان اكىمى جاردەماقى بەرۋمەن ولاردىڭ اينالىسپايتىنىن جانە تولەم تەك قانا ايدىڭ سوڭىندا بولاتىنىن جەتكىزدى. سونداي-اق، جالعىزباستى اناعا كومەك كورسەتىلەتىنىن ايتتى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى