Shymkent qalasynyń Abaı aýdanyndaǵy ákimdikte balalaryn qaldyryp ketken áıel ne úshin mundaı áreketke barǵanyn túsindirip berdi. Tórt balanyń 40 jastaǵy anasymen Tengrinews.kz tilshisi sóılesip qaıtty.
Gaýhar Úsibalıeva balalarmen shaǵyn ǵana páterde turady. "Munda turyp jatqanymyzǵa bir aı boldy. Buǵan deıin páterden-páterge kóship júrdik. Sońǵy jaldap turǵan úıimizdiń ishi kógerip ketken, óte ylǵal boldy. Osy baspanany alyp, arasynda dári-dármek, nan sekildi kerek zattardy berip turady. Bul páterge aıyna 30 myń tóleımin. 90 myń teńge járdemaqy berdi. Onyń 30 myńyn páterge, qalǵan 60 myńyna mektepke daıyndalyp, kıim-keshek, azyq-túlik alý kerek. Eń qıyny balalardyń aýyrǵan kezderi. Dári-dármekke aqsha bolmaı qalady", - deıdi Gaýhar Úsibalıeva.
Gaýhar bir jyl buryn kúıeýimen ajyrasqan. Onyń aıtýynsha, ajyrasýdyń sebebi - jarynyń únemi ony kemsitip, qorlaýy. Balalarǵa da qol jumsaǵan kezderi bolǵan. Burynǵy kúıeýi ekinshi toptaǵy múgedek eken. Gaýhar qazir bir jasar balasyna qarap otyrǵandyqtan jumysqa shyǵa almaıdy. Mundaı ómirden sharshaǵan ol ákimshilikten kómek suraǵanyn aıtady. "Ákimdikke bardym. Balalarymdy qalaı asyraımyn dep suradym. Olar maǵan "Múmkin sizde aqsha bar shyǵar, tekserip kóreıik" dedi. Men kóńilim bosap, ne úshin olaı istep jatqandaryn suradym.
Olar "Sen jaqsylyqty túsinbeıdi ekensiń, ket" dedi. Men jylap jiberdim. Men bir balamdy úıde, ekeýin ákimdikke qaldyryp, ózim bir balammen aýrýhanaǵa kettim. Maǵan sıstema qoıdy. Sosyn ákimdikke barsam balalarym otyr eken, onymen qosa polıııany da shaqyrǵan eken", - deıdi Gaýhar. Polıııaǵa barlyq mán-jaıdy túsindirýge týra keldi deıdi.
Gaýhardyń aıtýynsha, Abaı aýdany ákiminiń orynbasary kómek retinde azyq-túlik, 15 myń teńge jáne olardy úıge jetkizip tastaıtyn kólik usynǵan. Alaıda Gaýhar mundaı bir rettik kómekten bas tartqan. "Maǵan bári aıǵaılaı bastady. 15 teńge men azyq-túlikti alyp ket dedi. Odan da otyra bergenim jaqsy dedim. Maǵan kómek kerek. Alatyn 90 myń teńge maǵan jetpeıdi. Páterdiń ózine 30 myń beremin. Balalarǵa kıim-keshek, azyq-túlik pen dáriler alýym kerek. Tabys kózi múldem joq", - deıdi Gaýhar. Buǵan deıin Shymkent qalasynyń Abaı aýdanynda jalǵyzbasty ana balalaryn ákimdikte qaldyryp ketkenin aıtqan bolatynbyz. Ákimdiktegilerdiń aıtýy boıynsha, memlekettik ataýly kómekti merziminen buryn berýdi suraǵan. Aýdan ákimi járdemaqy berýmen olardyń aınalyspaıtynyn jáne tólem tek qana aıdyń sońynda bolatynyn jetkizdi. Sondaı-aq, jalǵyzbasty anaǵa kómek kórsetiletinin aıtty.
"Adyrna" ulttyq portaly
