«Dara» پرەزيدەنتتىك باستامالار قورى «Karga Seven Pictures» كينوستۋدياسىمەن بىرلەسە شىڭعىس حاننىڭ ۇلكەن ۇلى جوشى حاننىڭ ومىرىنە ارنالعان التى سەريادان تۇراتىن اعىلشىن تىلىندەگى گيبريدتى دەرەكتى-درامالىق تەلەحيكايا ءتۇسىرۋدى باستادى. بۇل تۋرالى «Dara» پرەزيدەنتتىك باستامالار قورىنىڭ ءباسپاسوز قىزمەتى حابارلادى.
تۋىندى التىن وردا يمپەرياسىنىڭ دامۋ كەزەڭدەرى جوشى حاننىڭ ءومىرىنىڭ تاريحى نەگىزىندە تۇسىرىلەدى.
تەلەحيكايانىڭ پروديۋسەرى كرەاتيۆتى ديرەكتورى ەمرە شاحين جەتەكشىلىك ەتەتىن «Karga Seven Pictures» كومپانياسى. ءتۇسىرىلىم 2024 جىلدىڭ كۇزىندە قازاقستان مەن تۇركيادا باستالادى دەپ جوسپارلانۋدا.
Karga Seven Pictures Netflix ءۇشىن 90-نان استام ەلدە ۇزدىك 10-تەلەحيكاياعا اينالعان Rise of Empires: Ottoman جانە Testament: The Story of Moses حيكايالارى سياقتى ءىرى تاريحي دەرەكتى درامالاردى ءتۇسىردى.
«جوشى حاننىڭ ءومىر تاريحى كەرەمەت ەپيكالىق، ول دۇنيە جۇزىندەگى كورەرمەندەردى قىزىقتىرارى ءسوزسىز. وسى اۋقىمدى تاريحي جوبانى جۇزەگە اسىرۋدا «Dara» قورىمەن بىرلەسىپ، جۇمىس جاساۋ ءبىز ءۇشىن ۇلكەن مارتەبە»، – دەپ اتاپ ءوتتى Karga Seven Pictures كرەاتيۆتى ديرەكتور ەمرە شاحين.
2024 جىلى جوشى ۇلىسىنىڭ قۇرىلعانىنا 800 جىل تولادى. وسى اتاۋلى كۇنگە ارنالعان تاريحي دەرەكتى جوبا مەملەكەتتىگىمىزدىڭ سان عاسىرلىق تامىرىن كورسەتەدى.
جاپپاي اۋديتورياعا ارنالعان دەرەكتى-دراما ۇلتتىق تاريحتى كەڭىنەن ناسيحاتتاۋعا، قازاق حالقىنىڭ ۇلى تاريحىن تانۋعا، حالىقارالىق اۋديتوريانىڭ قازاقستانعا دەگەن قىزىعۋشىلىعىن ارتتىرۋعا سەپتىگىن تيگىزەدى.
