“وقۋشىلارعا تاماق قالدىقتارىن بەرگەن”. زەرەندىدە اسحانا اسپازشىلارى شاعىم ءتۇسىردى

اقمولا وبلىسى، زەرەندى اۋىلىنداعى ورتا مەكتەپتىڭ اسپازشىلارى جاعا ۇستاتار جايتپەن ءبولىستى، دەپ حابارلايدى “ادىرنا” ۇلتتىق پورتالى. زەرەندى اۋىلىنداعى №1 ورتا مەكتەپتىڭ اسپازشىسى @nayzakokshe رەداكتسياسىنا اسحاناداعى جاعداي تۋرالى باياندادى. ونىڭ ايتۋىنشا، وتكەن جىلدىڭ قىركۇيەك ايىنان ءساۋىر ايىنا دەيىن جالعا الۋشىنىڭ (مەكتەپ اسحاناسىنىڭ مەڭگەرۋشىسى) نۇسقاۋىمەن قىزمەتكەرلەر ءبىرىنشى اۋىسىمنان قالعان تاماقتى جيناپ، كەيىن ەكىنشى اۋىسىمنىڭ بالالارىنا بەرىپ وتىرعان. «كەشەدەن قالعان» ونىمدەر مۇزداتقىشتا ساقتالىپ كەلگەن. سونداي-اق، كاسىپكەر اسپازشىلاردىڭ جالاقىسىن تولەمەگەن جانە زەينەتاقى قاراجاتىن دا ەسەپتەمەگەن. اسپازشىنىڭ ايتۋىنشا، ول پروكۋراتۋراعا حابارلاسقان. «اسحانادا قالدىقتاردى پايدالانۋ فاكتىلەرى جاريالانعانىمەن» تەكسەرۋ جابىلدى. اسپازشىلار كۇن سايىن بالالار ىشپەگەن ءسۇتتى شەلەككە قۇيىپ، سۋمەن سۇيىلتىپ، كەلەسى اۋىسىمنىڭ وقۋشىلارىنا بەرۋگە ءماجبۇر بولعان. قالعان كوتلەتتەردى، نان-توقاشتاردى، پالاۋدى توڭازىتىپ، ءبىر اپتادان كەيىن بالالارعا قايتا بەرىپ وتىرعان. شاعىمىن جەتكىزگەن زەرەندىلىك اسپازشى-ايەل تەكسەرۋ جۇرگىزۋدى سۇراپ، جالاقىلارىن تولەۋدى تالاپ ەتۋدە. مەكتەپ باسشىلىعى ەشقانداي زاڭبۇزۋشىلىق تابىلماعانىن ايتتى. «دۇرىس تاماقتانبادى دەگەن ايىپتاۋلار نەگىزسىز» دەپ اتادى. زەرەندى اۋداندىق ءبىلىم ءبولىمى قىزمەتتىك تەكسەرۋدى باستادى.