قر مادەنيەت جانە اقپارات مينيسترلىگى، مادەنيەت كوميتەتىنىڭ «وتىرار» مەملەكەتتىك ارحەولوگيالىق مۋزەي-قورىعى» رمقك-نىڭ ۇيىمداستىرۋىمەن 18-مامىردا «حالىقارالىق مۋزەيلەر كۇنى» كاسىبي مەرەكەسىنە وراي، « مۋزەي ءتۇنى – 2024» اكتسياسى اياسىندا «وتىرار – تاريح كەنىشى» تاقىرىبىندا تاريحي-تانىمدىق كەش ءوتتى.
ماقساتى: كوپشىلىكتىڭ قىزىعۋشىلىعىن، مۋزەي قۇندىلىقتارىنا دەگەن حالىقتىڭ ىستىق ىقىلاسىن ارتتىرىپ، قاتىسۋشىلاردىڭ ۇلتتىق سانا-سەزىمىن قالىپتاستىرۋ; ادام ومىرىندە جانە قوعامدا مۋزەيدىڭ الار ورنىنىڭ ماڭىزدىلىعىن ءتۇسىندىرۋ.
شارانىڭ شىمىلدىعىن «وتىرار» مەملەكەتتىك ارحەولوگيالىق مۋزەي-قورىعى» رمقك-ى ديرەكتورى جاندوسوۆ ايبەك كىستاۋباەۆيچ اشىپ بەرىپ، ەتنوگراف، ارداگەر جۇماشەۆ ابدۋللا، ولكەتانۋشى بەيسەنباي بەكجان سىندى قۇرمەتتى قوناقتار ۇيىمداستىرۋشىلار تاراپىنا العىسىن ايتىپ، ىستىق ىقىلاسىن جەتكىزدى.
تاريحي-تانىمدىق كەشتە مۋزەي ەكسپوزيتسيا زالىندا القاشقى قاۋىم، ياعني، تاس عاسىرى تۇسىنداعى ادامزات تىرشىلىگى، قازاق حالقىنىڭ XIX-Xح عاسىرداعى تۇرمىس-تىرشىلىگىن بەينەلەيتىن اعاش شەبەرلەرى مەن تەمىر ۇستالارىنىڭ كورىنىسى، قولونەر شەبەرلەرىنىڭ ءجۇن وڭدەۋ، ءجىپ ءيىرۋ، توقىما توقۋ ونەرلەرى، قۇمىراشىلاردىڭ قۇمىرا جاساۋ، ونى كۇيدىرۋ تاسىلدەرى بويىنشا شەبەرلىك ساباقتارى ءوتتى. ۇلتتىق ناقىشتا كيىنگەن مۋزەي قىزمەتكەرلەرى كەلى ءتۇيۋ، ديىرمەن تارتۋ، كۇبى ءپىسۋ، قامىر جايۋ سياقتى اسحانالىق تىرشىلىكتەن كورىنىستەر ۇسىندى.
سونداي-اق، مەكتەپكە دەيىنگى ۇيىم تاربيەلەنۋشىلەرىنە ارنالعان «دارا تۇلعا – ءابۋ ناسىر ءال-فارابي» ءمۋلتفيلمى كورسەتىلىپ، مۇمكىندىگى شەكتەۋلى ەرەكشە جاندارعا «وتىرار – عاجايىپتار ورداسى» اتتى ينكليۋزيۆتى تاقىرىپتىق ەكسكۋرسيا، مونعول اسەرىنىڭ شاپقىنشىلىعى، ءابۋ ناسىر ءال-فارابي بەينەسى سومدالعان قويىلىمدار قويىلىپ، ۆيكتورينالىق ويىندار ويناتىلدى.
ۇلتتىق سپورت تۇرلەرى: لاڭگى تەبۋ، قوشقار كوتەرۋ، قول كۇرەس، گىر تاسىن كوتەرۋ، سونىمەن قاتار، ۇرشىق ءيىرۋ، قىمىزمۇرىندىق سايىسى ۇيىمداستىرىلىپ، جەڭىمپازدارعا جۇلدەلى سىيلىقتار تابىستالدى.
