الماتىداعى كوپقاباتتى تۇرعىن ۇيلەردىڭ ءليفتىسىنىڭ جانىندا ەر ادامنىڭ ايەلدى اياماي ساباعانى قاۋىپسىزدىك كامەراسىنا ءتۇسىپ قالعان. بەينەجازبانى «نەمولچي» قوعامدىق قورىنىڭ جەتەكشىسى دينا ءتاڭسارى تەلەگرام ارناسىنا جۇكتەدى، دەپ حابارلايدى “ادىرنا” ۇلتتىق پورتالى.
بەينەجازبادا ەر كىسى ايەلدى 12 رەت ۇرىپ-تەۋىپ، باسپالداقتان تومەن قاراي قۇلاتىپ جىبەرەدى. ارتىنان ءوزى اسىقپاي ليفتىگە كىرەدى. ال ونىڭ ءبارىن ءليفتىنىڭ جانىندا تۇرعان ەكى جىگىت كورىپ تۇرادى. ولاردىڭ ءبىرى باسبۇزاردى توقتاتۋعا تىرىسقان ارەكەت جاساپ كورسە، ەكىنشىسى تاياق جەپ جاتقان ايەلگە ءمىز باقپاي قاراپ تۇرعان.
دينا ءتاڭسارى بەينەجازباداعى ايەل سوققىعا الىپ جاتقان ەر ادامنان اجىراسىپ كەتكەن، بىراق بۇرىنعى كۇيەۋى ونىڭ ىزىنە ءتۇسىپ، ۇرىپ جۇرگەنىن جازدى.
«ۆيدەودا ەكەۋى دە ەر كىسىنى توقتاتۋعا تىرىسپايدى. اياق-قولدارىن كىسەندەپ قويعانداي قاراپ تۇر. ءبىرى ءتىپتى بىلەگىن ايقاستىرىپ العان. ولار قورىققاننان ارالاسپاي تۇر دەپ ايتۋشى بولماڭىز. جوق، ولار قورقىپ تۇرعان جوق. ولار مۇنداي زورلىقتى ۇنەمى كورگەن، ولاردىڭ ەتى ۇيرەنىپ كەتكەن. ەسى دۇرىس ادام مۇندايدى كورگەندە ەسىنەن تانا جازدايدى. بىراق بىزدە ەمەس. ول ايەلدى كارتوپ سالعان قاپ سياقتى ۇرعىلادى. سودان كەيىن تۇك بولماعانداي ءبارى ليفتكە كىرىپ كەتتى. ال ايەلدىڭ جاي-كۇيى نە بولدى؟ ءتىرى مە؟ كومەك كەرەك شىعار، بىراق وعان ەشكىمنىڭ وعان باسى اۋىرمايدى»،- دەپ جازدى بەلسەندى.
الماتى پوليتسياسىنان بولعان وقيعاعا شارا قولدانۋ تالاپ ەتىلدى.
