باتىس قازاقستان وبلىسىندا سۋ تاسقىنى سالدارىنان كەلتىرىلگەن شىعىنداردى وتەۋ بويىنشا كوميسسيالار ءوز جۇمىستارىن جالعاستىرۋدا.
وبلىس اكىمىنىڭ ورىنباسارى تىلەپبەرگەن كايۋپوۆ ءمالىم ەتكەنىندەي، كوميسسيالار ورال قالاسى، قاراتوبە، سىرىم، بايتەرەك، ءبورلى جانە تەرەكتى اۋداندارىندا جۇمىس ىستەپ جاتىر.
تىلەپبەرگەن ەرسايۇلىنىڭ سوزىنە قاراعاندا، مۇمكىن بولاتىن جەرلەردە تەحنيكالىق تەكسەرۋلەر جۇرگىزىلۋدە.
«وبلىس بويىنشا توتەنشە جاعداي سالدارىنان 1 497 تۇرعىن ۇيگە زيان كەلتىرىلدى، سونىڭ ىشىندە 456-سى ءارى قاراي تۇرۋعا جارامسىز دەپ تانىلدى (قاراتوبە – 90, سىرىم – 114, تەرەكتى – 116, بايتەرەك – 9, ءبورلى – 127). كۇنى بۇگىن اتالعان اۋدانداردا جارامسىز دەپ تانىلعان تۇرعىن ۇيلەردى قالپىنا كەلتىرۋ بويىنشا جۇمىستار باستالدى. اتاپ ايتقاندا، سالىناتىن جاڭا تۇرعىن ۇيلەردىڭ جەر ۋچاسكەلەرى انىقتالىپ، ەسكى ورىندارى بۇزىلىپ، جەر جۇمىستارى جۇرگىزىلۋدە. قازىرگى كەزدە جەرگىلىكتى كومپانيالار قۇرىلىس جۇمىستارىن باستادى»، - دەدى ت.كايۋپوۆ.
زارداپ شەككەندەرگە 100 ايلىق ەسەپتىك كورسەتكىش مولشەرىندە بىرجولعى الەۋمەتتىك كومەك (369,2 مىڭ تەڭگە) كورسەتىلۋدە. وسى ورايدا 6 679 وتباسىنىڭ 2,4 ملرد تەڭگە الەۋمەتتىك كومەك العانىن ەسكە سالعان وبلىس اكىمىنىڭ ورىنباسارى بۇل باعىتتا ساياجاي تۇرعىندارىنا دا جاردەم بەرىلەتىنىن جەتكىزدى.
«ساياجاي اۋماقتارىنان سۋدىڭ كەتپەۋىنە بايلانىستى قيىندىق تۋىنداپ وتىرعانى بەلگىلى. وسىعان وراي «عارىش ساپارى» جانە باسقا قۇزىرلى مەكەمەلەردىڭ تەحنيكالىق مۇمكىندىكتەرىن پايدالانا وتىرىپ، تۇرعىنداردىڭ مەكەنجايىنداعى مۇلكىنە قانشالىقتى شىعىن كەلگەنىن انىقتاۋدامىز. سوعان بايلانىستى بىرجولعى الەۋمەتتىك كومەك بەرىلەتىن بولادى. سونىمەن قاتار 8 500-دەي ساياجاي تۇرعىندارىنان ءوتىنىش ءتۇسىپ، سونىڭ ىشىندە حالىققا قىزمەت كورسەتۋ ورتالىقتارى ارقىلى 2 500-دەي ارىز بەرۋشىنىڭ وزگە باسپاناسى جوق ەكەندىگى انىقتالدى. ايتسە دە كەلەسى كەزەڭدە ولاردىڭ وتباسى مۇشەلەرىنىڭ يەلىگىندە ءۇيى بار ما، جوق پا، ول دا تەكسەرىلەدى. تەك سودان كەيىن عانا باسقا باسپاناسى بولماعان جاعدايدا پاتەر ساتىپ الىپ بەرۋ نەمەسە جاڭادان سالۋ ماسەلەسى قاراستىرىلاتىن بولادى. مۇنىڭ ءبارىن ءبىز بارىنشا تەزدەتىپ شەشۋگە كۇش سالىپ جاتىرمىز»، - دەدى ت.كايۋپوۆ.
