Batys Qazaqstan oblysynda sý tasqyny saldarynan keltirilgen shyǵyndardy óteý boıynsha komıssııalar óz jumystaryn jalǵastyrýda.
Oblys ákiminiń orynbasary Tilepbergen Kaıýpov málim etkenindeı, komıssııalar Oral qalasy, Qaratóbe, Syrym, Báıterek, Bórli jáne Terekti aýdandarynda jumys istep jatyr.
Tilepbergen Ersaıulynyń sózine qaraǵanda, múmkin bolatyn jerlerde tehnıkalyq tekserýler júrgizilýde.
«Oblys boıynsha tótenshe jaǵdaı saldarynan 1 497 turǵyn úıge zııan keltirildi, sonyń ishinde 456-sy ári qaraı turýǵa jaramsyz dep tanyldy (Qaratóbe – 90, Syrym – 114, Terekti – 116, Báıterek – 9, Bórli – 127). Kúni búgin atalǵan aýdandarda jaramsyz dep tanylǵan turǵyn úılerdi qalpyna keltirý boıynsha jumystar bastaldy. Atap aıtqanda, salynatyn jańa turǵyn úılerdiń jer ýchaskeleri anyqtalyp, eski oryndary buzylyp, jer jumystary júrgizilýde. Qazirgi kezde jergilikti kompanııalar qurylys jumystaryn bastady», - dedi T.Kaıýpov.
Zardap shekkenderge 100 aılyq eseptik kórsetkish mólsherinde birjolǵy áleýmettik kómek (369,2 myń teńge) kórsetilýde. Osy oraıda 6 679 otbasynyń 2,4 mlrd teńge áleýmettik kómek alǵanyn eske salǵan oblys ákiminiń orynbasary bul baǵytta saıajaı turǵyndaryna da járdem beriletinin jetkizdi.
«Saıajaı aýmaqtarynan sýdyń ketpeýine baılanysty qıyndyq týyndap otyrǵany belgili. Osyǵan oraı «Ǵarysh sapary» jáne basqa quzyrly mekemelerdiń tehnıkalyq múmkindikterin paıdalana otyryp, turǵyndardyń mekenjaıyndaǵy múlkine qanshalyqty shyǵyn kelgenin anyqtaýdamyz. Soǵan baılanysty birjolǵy áleýmettik kómek beriletin bolady. Sonymen qatar 8 500-deı saıajaı turǵyndarynan ótinish túsip, sonyń ishinde halyqqa qyzmet kórsetý ortalyqtary arqyly 2 500-deı aryz berýshiniń ózge baspanasy joq ekendigi anyqtaldy. Áıtse de kelesi kezeńde olardyń otbasy músheleriniń ıeliginde úıi bar ma, joq pa, ol da tekseriledi. Tek sodan keıin ǵana basqa baspanasy bolmaǵan jaǵdaıda páter satyp alyp berý nemese jańadan salý máselesi qarastyrylatyn bolady. Munyń bárin biz barynsha tezdetip sheshýge kúsh salyp jatyrmyz», - dedi T.Kaıýpov.
