«مايقايىڭالتىن» اق جەر استىنا اۆتوبۋسپەن بىرگە ءتۇسىپ كەتكەن ازاماتتاردى ىزدەۋ جۇمىستارىن قايتا جالعاستىردى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
كاسىپورىننىڭ جاڭا باسشىلىعى اپات بولعان ويىق استىنان قوس قۇتقارۋشىنى ىزدەۋدى 13 مامىردان قايتا باستادى.
«مايقايىڭالتىن» اق-نىڭ جاڭا ديرەكتورى قايروللا جۇرسىنباەۆ 4 قاڭتار كۇنى تۇنگى ۋاقىتتا شۇڭقىرعا قۇلاعان اۆتوبۋستى ىزدەۋ جۇمىستارىن قايتا جانداندىرۋ تۋرالى شەشىم قابىلداعان. بۇل تۋرالى قۇتقارۋشى ايدوس شايمەردەننىڭ جارى نۇرسۇلۋ شايمەردەن حابارلادى.
اۆتوبۋس ىشىندە ەكى ادام بولعان. ونىڭ ءبىرى - ايدوس شايمەردەن بولسا، ەكىنشىسى – جەدەل اۆتوكولىك جۇرگىزۋشىسى ايىپ تىلەۋبەرگەنوۆ.
«13 مامىردان باستاپ ايدوس پەن ونىڭ ارىپتەسىن ىزدەۋ جۇمىستارى قايتا باستالدى. ءبىزدىڭ وتباسىمىز بۇل كۇندى ۇزاق ۋاقىتتان بەرى تاعاتسىزدانا كۇتكەن ەدىك. قۇتقارۋشىلار جاقىن ادامدارىمىزدى تاۋىپ الاتىنىنا سەنىمدىمىز. كاسىپورىن باسشىلىعى ايتقانداي، ەڭ اۋەلى ويىق ماڭىندا كەن جىنىستارىن قازۋ جۇمىستارى جۇرگىزىلەدى. سودان سوڭ كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ قۇتقارۋشىلارى ىسكە كىرىسەدى. قازىرگى ۋاقىتتا جۇمىستار تاۋلىك بويى جۇرگىزىلىپ جاتىر. باس ديرەكتور قايروللا جۇرسىنباەۆ جەر استىندا جاتقان قوس ازاماتتى تاۋىپ العان سوڭ عانا شاحتا ىسكە قوسىلاتىنىن جەتكىزدى»، - دەدى نۇرسۇلۋ شايمەردەن Kazinform اگەنتتىنىنىڭ تىلشىسىنە بەرگەن سۇحباتىندا.
«مايقايىڭالتىن» اق-نىڭ جاڭا باسشىلىعى ىزدەۋ-قۇتقارۋ جۇمىستارى تۋرالى اقپارات بەرۋدەن باس تارتىپ وتىر.
ەسكە سالا كەتەيىك، شۇڭقىرعا قۇلاعان اۆتوبۋس پەن ازاماتتاردى ىزدەۋ جۇمىستارى 5 اقپان كۇنى توقتاتىلعان بولاتىن.
