«Maıqaıyńaltyn» AQ jer astyna avtobýspen birge túsip ketken azamattardy izdeý jumystaryn qaıta jalǵastyrdy, dep habarlaıdy "Adyrna" ulttyq portaly QazAqparatqa siltep.
Kásiporynnyń jańa basshylyǵy apat bolǵan oıyq astynan qos qutqarýshyny izdeýdi 13 mamyrdan qaıta bastady.
«Maıqaıyńaltyn» AQ-nyń jańa dırektory Qaırolla Júrsinbaev 4 qańtar kúni túngi ýaqytta shuńqyrǵa qulaǵan avtobýsty izdeý jumystaryn qaıta jandandyrý týraly sheshim qabyldaǵan. Bul týraly qutqarýshy Aıdos Shaımerdenniń jary Nursulý Shaımerden habarlady.
Avtobýs ishinde eki adam bolǵan. Onyń biri - Aıdos Shaımerden bolsa, ekinshisi – jedel avtokólik júrgizýshisi Aıyp Tileýbergenov.
«13 mamyrdan bastap Aıdos pen onyń áriptesin izdeý jumystary qaıta bastaldy. Bizdiń otbasymyz bul kúndi uzaq ýaqyttan beri taǵatsyzdana kútken edik. Qutqarýshylar jaqyn adamdarymyzdy taýyp alatynyna senimdimiz. Kásiporyn basshylyǵy aıtqandaı, eń áýeli oıyq mańynda ken jynystaryn qazý jumystary júrgiziledi. Sodan soń kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń qutqarýshylary iske kirisedi. Qazirgi ýaqytta jumystar táýlik boıy júrgizilip jatyr. Bas dırektor Qaırolla Júrsinbaev jer astynda jatqan qos azamatty taýyp alǵan soń ǵana shahta iske qosylatynyn jetkizdi», - dedi Nursulý Shaımerden Kazinform agenttininiń tilshisine bergen suhbatynda.
«Maıqaıyńaltyn» AQ-nyń jańa basshylyǵy izdeý-qutqarý jumystary týraly aqparat berýden bas tartyp otyr.
Eske sala keteıik, shuńqyrǵa qulaǵan avtobýs pen azamattardy izdeý jumystary 5 aqpan kúni toqtatylǵan bolatyn.
