وسكەمەندە قاراۋسىز قالعان جاعالاۋ ساياباققا اينالدى

1891
Adyrna.kz Telegram

وسكەمەندەگى كوپ جىلدان بەرى قاراۋسىز، يەن جاتقان اۋماقتا جاڭا سپورتتىق-تابيعي-ەكولوگيالىق ساياباق بوي كوتەردى.

ايتا كەتەيىك، وتكەن جىلى وبلىس اكىمى دانيال احمەتوۆتىڭ تاپسىرماسىمەن بۇل جەردە اۋقىمدى اباتتاندىرۋ جۇمىستارى باستالدى. ناتيجەسىندە مۇندا تاماشا دەمالىس ورنى پايدا بولدى.

اعىمداعى جىلدىڭ 15 تامىزىندا «سامال» ساياباعىنداعى اۋقىمدى اباتتاندىرۋ جۇمىستارى تولىق اياقتالادى. وسكەمەندە سالىنىپ جاتقان جاڭا ساياباققا بارعان وبلىس اكىمى دانيال احمەتوۆ وسىلاي دەدى.

– بۇل جەر وسكەمەندىكتەر مەن قالا قوناقتارىنىڭ سۇيىكتى ورىندارىنىڭ بىرىنە اينالادى. راس، بىلتىر وسى جۇمىستى باستاعالى جاتقاندا، بۇل ارەكەتىمىزگە كۇمانمەن قاراعاندار كوپ بولدى. ويتكەنى بۇل جەر كوپ جىل بويى قاراۋسىز، يەن جاتقان ەدى. دەگەنمەن ءبىز ءبىر-اق جىلدىڭ ىشىندە ونى ادام تانىماستاي ەتىپ وزگەرتتىك. جالپى، بۇل ساياباقتى قالاداعى باسقا پاركتەردەن تابيعاتى ەرەكشەلەپ تۇراتىن بولادى. ەڭ باستىسى، مۇندا كەلۋشىلەر سپورتتىڭ بارلىق تۇرىمەن اينالىساتىن بولادى. وعان بارلىق جاعداي جاسالادى، – دەگەن ايماق باسشىسى دەمالىس ورنى اۋماعىندا اتقارىلعان جۇمىستاردى وڭ باعالاپ، نىسان قولدانىسقا ۋاقتىلى بەرىلۋى كەرەك ەكەنىن ايتتى.

ەستەرىڭىزگە سالا كەتەيىك، جاڭا ساياباق وكتيابر ارالىندا سالىنۋدا. وندا زاماناۋي جاعاجاي، ءتۇرلى سپورتتىق نىساندار، جۇگىرۋ جولاقتارى، ۆەلوسيپەد جولى، روللەردروم، سكەيتپارك، بالالار الاڭقايلارى مەن فۋدكورتتار (تاماقتاناتىن ورىندار), پوليتسيا مەن مەديتسينالىق پۋنكت سياقتى نىساندار سالۋعا باعىتتالۋدا. بۇگىندە ساياباقتىڭ سىرتىنا كەم دەگەندە 200 اۆتوموبيل سىياتىن كولىك تۇراعىن دا سالعان. سونداي-اق مۇندا دەمالۋشىلارعا قۇتقارۋشىلار مەن مەديتسينا قىزمەتكەرلەرى ءتيىستى كومەك تۇرلەرىن كورسەتەتىن بولادى.

ساياباق اۋماعىنا كولىكپەن كىرۋگە تىيىم سالىنادى. مۇنداعى باستى ماقسات – دەمالۋشىلاردىڭ قاۋىپسىزدىگىن قامتاماسىز ەتۋ. سول سياقتى يتپەن كىرەم دەۋشىلەرگە بولەك اۋماق بەرىلەدى.

– وسى ساياباقتا بارلىعى تابيعي بولۋى كەرەك. تۇرعىندار مۇندا تەك دەمالۋعا عانا ەمەس، تابيعاتقا ءبىر تابان بولسىن جاقىنداۋ ءۇشىن كەلۋلەرى ءتيىس. سوندىقتان گازونداردى قىرقىپ، قارا جەردى تەگىستەۋدىڭ دە قاجەتى جوق، - دەپ اتاپ ءوتتى ايماق باسشىسى.

ايتا كەتەيىك، «سامال» ساياباعىنداعى بالالارعا ارنالعان كول مەن جاعاجاي دايىن بولدى.

قالالىق تۇكش، جولاۋشىلار كولىگى جانە اۆتوموبيل جولدارى ءبولىمىنىڭ مالىمەتىنە سەنسەك، ەرتىستى جاناي اققان ارنا قوقىستان تولىق تازارتىلىپ، وندا تازا سۋ جىبەرىلەدى.

الداعى ۋاقىتتا مۇندا بالالارعا ارنالعان ورىندىق، شاتىر جانە كۇنگە قىزدىرىنىپ جاتۋعا ارنالعان توسەكتەر قويىلادى.

– كولشىك ۋاقىتىلى تازارتىلىپ، ارا-تۇرا سۋى دا اۋىستىرىلىپ تۇرادى، – دەدى «استاس» جشس-نىڭ ديرەكتورى بوريس نەۆزوروۆ.

ايماق باسشىسى دانيال احمەتوۆ وسكەمەندەگى بەيبىتشىلىك كوشەسىندە سالىنىپ جاتقان جاياۋ جۇرۋگە ارنالعان كوشەگە بارىپ، قۇرىلىس جۇمىستارىنىڭ بارىسىمەن تانىستى.

ايتا كەتەيىك، جوسپار بويىنشا وبلىس ورتالىعىنداعى تۇڭعىش جاياۋ جۇرگىنشىلەرگە ارنالعان كوشەنىڭ ءبىرىنشى بولىگى (ساعادات نۇرماعامبەتوۆ جəنە ماكسيم گوركي كوشەلەرىنىڭ ارالىعى) قىركۇيەك ايىنىڭ بىرىنە دەيىن سالىنىپ ءبىتۋى كەرەك.

قۇرىلىس قارقىنىمەن تانىسقان ايماق باسشىسى وعان وڭ باعاسىن بەردى.

– تاياۋدا بۇل اۋماققا جاڭا كەلبەتكە يە بولادى. مۇندا گۇلزارلار مەن كەلۋشىلەر دەمالاتىن ورىندىقتار قويىلىپ، بالالار الاڭقايى مەن سۋبۇرقاق سالىنادى، – دەدى دانيال احمەتوۆ.

 

"ادىرنا" ۇلتتىق پورتالى

پىكىرلەر