بۇگىن استانا سوتىندا ايەلىن ءولتىردى دەپ ايىپتالعان ەكس-مينيستر قۋاندىق بيشىمباەۆ پەن ونىڭ تۋىسى باقىتجان بايجانوۆقا قاتىستى سوت پروتسەسى جالعاسىپ جاتىر. سوت بارىسىندا القابيلەرگە قويىلعان سۇراقتار بەلگىلى بولدى، دەپ حابارلايدى “ادىرنا” ۇلتتىق پورتالى.
ىسكە توراعالىق ەتەتىن سۋديا ايجان قۇلباەۆا 13 مامىرداعى سوت وتىرىسىندا ۇكىم شىعارۋ بارىسىندا القابيلەر كەڭەسۋ بولمەسىندە جاۋاپ بەرۋى كەرەك سۇراقتاردى وقىدى. ونىڭ ىشىندە، بيشىمباەۆقا قاتىستى قك 110-بابى بويىنشا قويىلعان سۇراقتار:
- 2022 جىلدىڭ 16 جەلتوقسانىنان 2023 جىلدىڭ 9 قاراشاسىنا دەيىن، 2022 جىلدىڭ ناۋرىز، ءساۋىر، قازانىندا، سونداي-اق 2023 جىلدىڭ جازىندا استانا جانە الماتى قالالارىندا جابىرلەنۋشى نۇكەنوۆاعا دەنەسىنىڭ ءتۇرلى بولىگىن جانە باسىنان ۇرۋ ارقىلى فيزيكالىق قىسىم جاسالعانى، ار-نامىسىنا تيۋ ارقىلى مورالدىق قىسىم جاسالعانى دالەلدەندى مە؟
- بۇل ارەكەتتى سوتتالۋشى بيشىمباەۆتىڭ جاساعانى دالەلدەندى مە؟
- سوتتالۋشى بيشىمباەۆ بۇل ارەكەتتى جاساعانىنا كىنالى مە؟
- جابىرلەنۋشى نۇكەنوۆانىڭ سوتتالۋشى بيشىمباەۆپەن بىرگە تۇرا باستاعان ۋاقىتتان باستاپ ءوز بەتىنشە اقشا تابۋدى دوعارىپ، وعان ماتەريالدىق تۇرعىدا تاۋەلدى بولدى ما؟
قىلمىستىق كودەكستىڭ 99-بابى بويىنشا قويىلاتىن سۇراقتار رەتى:
- 2023 جىلدىڭ 9 قاراشاسىندا شامامەن تۇستەن كەيىن استاناداعى Bau مەيرامحاناسىندا جابىرلەنۋشى نۇكەنوۆا باس-مي جاراقاتى سالدارىنان قايتىس بولعانى دالەلدەندى مە؟
- بۇل جاراقات جابىرلەنۋشى نۇكەنوۆاعا باسىنا بىرنەشە سوققىنى سانالى تۇردە جاساۋ ارقىلى ماقساتتى تۇردە ولتىرگەنى دالەلدەندى مە؟
- بۇل ارەكەتتى سوتتالۋشى بيشىمباەۆتىڭ جاساعانى دالەلدەندى مە؟
- سوتتالۋشى بيشىمباەۆ بۇل ارەكەتتى جاساعانىنا كىنالى مە؟
- سوتتالۋشى بيشىمباەۆتىڭ جابىرلەنۋشى نۇكەنوۆانى ۇرىپ-سوعىپ، وعان سۋ مەن ۇيقى بەرمەي قورلاپ، اياسۋسىز فيزيكالىق قىسىم جاساۋ ارقىلى ولتىرگەنى دالەلدەندى مە؟
- نۇكەنوۆا باسىنان العان جاراقات سانالى تۇردە جاسالعانى، ونىڭ دەنساۋلىعىنا اسا اۋىر زيان كەلتىرگەنى، سونىڭ سالدارىنان قايتىس بولعانى دالەلدەندى مە؟ سوتتالۋشى بيشىمباەۆتىڭ بۇل ارەكەتتى جاساعانى دالەلدەندى مە جانە سوتتالۋشى بيشىمباەۆ بۇل ارەكەتتى جاساعانى ءۇشىن كىنالى مە؟
ايتا كەتەيىك، سۋديا ايجان قۇلباەۆا شەشىم شىعارۋ ءۇشىن 10 نەگىزگى القابيمەن بىرگە كەڭەسۋ بولمەسىنە كەتتى.
ەسكە سالساق، قۋاندىق بيشىمباەۆقا قىلمىستىق كودەكستىڭ 99-بابى جانە 110-بابى بويىنشا ايىپ تاعىلعان.
ال باقىتجان بايجانوۆ قىلمىستىق كودەكستىڭ 432-بابى بويىنشا ايىپتالىپ وتىر.
