ايەلىن اياۋسىز ءولتىردى دەپ ايىپتالىپ، 24 جىلعا سوتتالعان ەكس-مينيستر قۋاندىق بيشىمباەۆتىڭ ءىسىن قاراعان سۋديا ايجان قۇلباەۆا وزىنە قارسى قورقىتۋلاردان كەيىن قورعاۋعا الىنعان. قاۋىپسىزدىك شاراسى ءالى دە كۇشىندە. بۇل تۋرالى جوعارعى سوتتىڭ قىلمىستىق ىستەر جونىندەگى سوت القاسىنىڭ توراعاسى نازگۇل رەحمەتۋللينا ايتتى،دەپ حابارلايدى “ادىرنا” ۇلتتىق پورتالى.
ءماجىلىس كۋلۋارىندا جۋرناليستەر راحمەتۋللينادان "سۋديا ايجان قۇلباەۆا ءالى قورعاۋدا ما" دەپ سۇرادى.
"ۇمىتپاسام، سول كەزدە قاۋىپسىزدىك شاراسى ءالى كۇشىندە ەكەنى جاريالانعان بولاتىن", - دەدى سوت القاسىنىڭ توراعاسى.
ايتا كەتەيىك، بۇعان دەيىن بيشىمباەۆ ءىسى بويىنشا سۋديانى بەلگىسىز بىرەۋلەر قورقىتقانى جانە ول قاۋىپسىزدىك شارالارىمەن قامتاماسىز ەتىلگەنى حابارلاندى.
قىلمىستىق كودەكستىڭ 407-بابىنىڭ 1-بولىگى ("سوت تورەلiگiن جۇزەگە اسىرۋعا كەدەرگi جاساۋ ماقساتىندا سوتتىڭ قىزمەتiنە ارالاسۋ") بويىنشا سوتالدى ءىس جۇرگىزۋ باستالعانى ايتىلدى. سۋديا، جەكە قاۋىپسىزدىك شارالارىمەن قامتاماسىز ەتىلگەن.
