كورەيالىق پروفەسسورلار قازاقستاندا درون سالاسىنا قاجەتتى ماماندار دايارلاماق. مۇنداي كەلىسىمگە ەلىمىزدىڭ ونەركاسىپ جانە قۇرىلىس مينيسترلىگى دەلەگاتسياسىنىڭ وڭتۇستىك كورەياعا ساپارى بارىسىندا قول جەتكىزىلدى، دەپ حابارلايدى “ادىرنا” 24kz ارناسى سىلتەپ.
اقپاراتقا سايكەس، دەلەگاتسيا مۇشەلەرى 3 كۇن ىشىندە كورەيا ۇكىمەتى مۇشەلەرىمەن، ءىرى كومپانيالاردىڭ باسشىلارىمەن كەلىسسوزدەر جۇرگىزىپ، دجەي جانە شينحان ۋنيۆەرسيتەتتەرىندە بولدى. وندا ولار دارىسكە قاتىسىپ، درونداردى جاساۋ ءۇشىن ينجەنەرلەردى وقىتۋ ۇدەرىسىمەن تانىستى.
ونەركاسىپ جانە قۇرىلىس مينيسترلىگىنىڭ مالىمەتىنشە، ازىرگە قازاقستاندا ەكى ۋنيۆەرسيتەتتە عانا دروندار كافەدرالارى بار. ەندى دجەي ۋنيۆەرسيتەتىنىڭ كومەگىمەن تاعى ءبىر فاكۋلتەت اشىلماق. كورەيالىق پروفەسسورلار قازاقستاندا درون سالاسىنا قاجەتتى ماماندار دايارلايدى.
ونەركاسىپ جانە قۇرىلىس ۆيتسە-ءمينيسترى ازامات بەيىسبەكوۆتىڭ ايتۋىنشا، دجەي اكادەمياسىندا جوعارعى سىنىپ وقۋشىلارىنان باستاپ ناقتى وندىرىستە جۇمىس ىستەيتىن ادامدارعا دەيىن ارنايى سولارعا ماماندىرىلعان باعدارلامالار بار.
"سولاردى قولدانا وتىرىپ، مامانداردى دايارلايمىز. الداعى ۋاقىتتا دجەي ۋنيۆەرسيتەتى قازاقستانعا كەلىپ، ءبىزدىڭ ۋنيۆەرسيتەتتەرىمىزدى ارالاپ، تەحنيكالىق ۋنيۆەرسيتەتتەرىمىزدى، ولاردىڭ ىشىنەن وزدەرىنە ارىپتەس تاندايدى. بىزگە كورەي جانە تۇرىك تاراپتارى درونداردى ءوندىرۋ تەحنولوگياسى مەن قۇزىرەتتىلىگىن بەرۋگە دايىن", - دەيدى ازامات بەيىسبەكوۆ.
