بۇگىن «تازا قازاقستان» رەسپۋبليكالىق ەكولوگيالىق اكتسياسىنىڭ «ءمولدىر بۇلاق» ونكۇندىگى اياسىندا وبلىس تۇرعىندارى ۇزاق قىستان كەيىن وزەندەردىڭ، كولدەردىڭ جاعالاۋلارىن جانە بۇلاق كوزدەرىن تازارتۋعا شىقتى.
اقمولا وبلىسى ىشكى ساياسات باسقارماسىنىڭ مالىمەتىنشە، اكتسيا تابيعي سۋ ايدىندارى كوپ بۋراباي، اتباسار، ارشالى، ەرەيمەنتاۋ، قورعالجىن، زەرەندى اۋداندارى مەن كوكشەتاۋ قالاسىنىڭ اۋماعىندا قارقىندى جۇرگىزىلۋدە.
ماسەلەن، اتباسار اۋدانىنداعى نوۆوسەلسكوە اۋىلىندا جىلاندى وزەنىنىڭ سۋ قويماسىندا سەنبىلىك ءوتتى. سەرگەەۆ اۋىلدىق وكرۋگىنىڭ تۇرعىندارى مەن بەلسەندى جاستارى ەسىل وزەنىنىڭ جاعاسىن قوقىستان تازارتتى. بۇدان ءارى ەكولوگيالىق اكتسيا باستاۋ اۋىلىندا جالعاستى.
ەرەيمەنتاۋ اۋدانىنىڭ نوۆوماركوۆكا، قويتاس، بەستوعاي، ولجاباي باتىر، اقمىرزا اۋىلدارىندا ولەڭتى جانە كارىباي وزەندەرىنىڭ جاعالاۋ تازارتۋ بويىنشا اكتسيالار ءوتتى.
ارشالى اۋدانىندا ەسىل وزەنىنىڭ، كىشى جانە ۇلكەن سارابا كولدەرىنىڭ جاعالاۋلارى، اناركول كولىنىڭ ماڭى جاپپاي جينالدى. ەكولوگيالىق اكتسياعا قاتىسۋعا ارشالى اۋدانىنان 1500-دەن استام ادام قاتىستى. تۇرعىنداردىڭ بىرلەسكەن كۇش-جىگەرىمەن 22,5 كم جاعالاۋ تازارتىلىپ، 63 تونناعا جۋىق قوقىس شىعارىلدى.
«ءمولدىر بۇلاق» اپتالىعى اياسىنداعى ەڭ اۋقىمدى ەكولوگيالىق اكتسيا «قازاقستاننىڭ ءىنجۋ – مارجانى – بۋرابايدا» كۋرورتىندا ءوتتى.
بۋراباي اۋدانىنىڭ اكىمى اراي سادىقوۆ اتاپ وتكەندەي، اكتسيا اياسىندا بۋراباي كەنتىنىڭ تۇرعىندارى، ەرىكتىلەر، جاستار ۇيىمدارىنىڭ وكىلدەرى، مەديتسينالىق جانە ءبىلىم بەرۋ مەكەمەلەرىنىڭ قىزمەتكەرلەرى، مەملەكەتتىك قىزمەتشىلەر جانە ارداگەرلەردەن قۇرالعان بارلىعى 3 مىڭعا جۋىق ادام قاتىستى.
«جىلىنا 1 ميلليوننان استام ءتۋريستى قابىلدايتىن ايماق رەتىندە ءبىز ارقاشان تازالىق ماسەلەسىنە ەرەكشە نازار اۋدارامىز. «تازا قازاقستان» ەكولوگيالىق اكتسياسى باستالعاننان بەرى 12 مىڭ توننادان استام قوقىس جينالدى. بۇگىن ءبىز بۋراباي كەنتى مەن ششۋچينسك قالاسىندا ورنالاسقان كولدەردىڭ اۋماعىن تازالايمىز»، - دەدى اراي سادىقوۆ.
ايتا كەتەيىك، اقمولا وبلىسى بويىنشا بۇل كۇندەرى 250 مىڭعا جۋىق ادامنىڭ قاتىسۋىمەن 300-گە جۋىق ەكولوگيالىق ءىس-شارا وتكىزۋ جوسپارلانعان.
