تانىمال قازاقستاندىق پروديۋسەر، اكتريسا جانە كاسىپكەر بايان الاگوزوۆا 10 مامىر كۇنى جازىلۋشىلارىمەن قۋانىشتى جاڭالىعىمەن ءبولىستى، دەپ حابارلايدى “ادىرنا” ۇلتتىق پورتالى.
ول ءوزىنىڭ Instagram پاراقشاسىندا امەريكالىق تانىمال رەپەر سنۋپ دوگگتىڭ قازاقستاندىق KeshYOU توبىمەن بىرگە بەينەبايان تۇسىرگەنىن ايتتى.
«ءبىز ينتريگانى ساقتاپ، ونى بومبا ەتىپ جاريالاعىمىز كەلدى، بىراق Snoop Dogg مۇنى ءبىز ءۇشىن جاسادى، مەنىڭ قىمباتتى جازىلۋشىلارىم، مەن سىزدەردەن Snoop-قا جىلى شىراي تانىتۋلارىڭىزدى سۇرايمىن. ءبىزدىڭ قىزدار، ءبىزدىڭ KeshYOU, ولار شىنىمەن كەرەمەت»، – دەپ جازدى بايان الاگوزوۆا.
قازاقستاندىق پروديۋسەر رەپەرمەن بىرگە تۇسكەن سۋرەتىن دە جاريالادى. وندا سنۋپ دوگتىڭ قازاقشا شاپان مەن كەپكا كيگەنى كورسەتىلگەن. بايان الاگوزوۆا ۇلتتىق كيىمدەردىڭ قازاقستاندىق ديزاينەر ايدا قاۋمەنوۆانىڭ تۋىندىسى ەكەنىن اتاپ ءوتتى.
«ايدا، قىمباتتى دوسىم، سنۋپقا ءسىزدىڭ شاپانىڭىز بەن باس كيىمىڭىز قاتتى ۇنادى جانە ول ونى ءبىزدىڭ الداعى عاسىرلار بويى ەستە قالاتىن بەينەبايانىمىزدا كيىپ ءتۇستى»، - دەدى ول.
ايتا كەتەيىك، رەپەر دە Instagram جەلىسىندەگى پاراقشاسىندا جاڭا ترەك شىعارعانىن حابارلادى.
