قازاقستاندىقتار ەندى البانيا مەملەكەتىنە 90 كۇنگە ۆيزاسىز بارا الادى. بۇل تۋرالى ۇكىمەتتىڭ ءتيىستى قاۋلىسى اشىق نورماتيۆتىك-قۇقىقتىق اكتىلەر سايتىندا جاريالاندى، دەپ حابارلايدى “ادىرنا” ۇلتتىق پورتالى.
«جارامدى جول ءجۇرۋ قۇجاتتارى بار قر ازاماتىنان البانيا رەسپۋبليكاسىنا 90 كۇننەن اسپايتىن ۋاقىتقا ءبىر نەمەسە بىرنەشە رەت بارعاندا، ترانزيتپەن وتكەندە جانە ۋاقىتشا بولعان كەزدە ولاردان ۆيزالىق تالاپتار سۇرالمايدى. البانيا رەسپۋبليكاسىنىڭ اۋماعىندا بولعان كەزدە ءوزىنىڭ قۇجاتتارىن جوعالتقان قازاقستان رەسپۋبليكاسىنىڭ ازاماتى سول ەلدەگى قازاقستان ەلشىلىگىنە نەمەسە كونسۋلدىق بولىمشەلەرىنە بارىپ، وكىلدىكتەر ۇسىنعان ۋاقىتشا قۇجات ارقىلى البانيا اۋماعىنان تىس جەرلەرگە شىعا الادى»، - دەلىنگەن قاۋلىدا.
قازاقستان رەسپۋبليكاسىنىڭ ازاماتىندا بولۋى ءتيىس جول ءجۇرۋ قۇجاتتارى:
- ديپلوماتيالىق پاسپورت;
- قىزمەتتىك كۋالىك;
- قازاقستان رەسپۋبليكاسىنىڭ ازاماتى ەكەنىن راستايتىن كۋالىك;
- قازاقستان رەسپۋبليكاسىنا قايتىپ ورالۋعا ارنالعان كۋالىك.
قۇجاتقا سايكەس، توتەنشە جاعداي نەمەسە وزگە دە وقىس وقيعاعا تاپ بولىپ، البانيا تەرريتورياسىنان كەتۋ مۇمكىندىگى بولماعان قازاقستاندىقتار سول ەلدىڭ قۇزىرەتتى ورگاندارىنا ءوتىنىش بەرىپ، تۇرۋ مەرزىمىن ۇزارتا الادى.
”ادىرنا” ۇلتتىق پورتالى
